*

mánudagur, 18. janúar 2021
Innlent 6. október 2020 17:28

Apple boðar líklega sína fyrstu 5G síma

Tæknifyrirtækið boðar kynningu þann 13. október þar sem talið er að nýir iPhone símar verði kynntir, sem styðji við 5G tæknina.

Ritstjórn
epa

Bandaríska tæknifyrirtækið Apple boðar rafrænan kynningarfund þriðjudaginn 13. október næstkomandi þar sem talið er að félagið muni kynna nýja línu iPhone farsíma sinna, þar á meðal þá fyrstu sem styðji við 5G tæknina.

Í september hélt fyrirtækið sem þekkt er fyrir ýmsar vinsælar og vel hannaðar tæknivörur rafrænan kynningarfund en þar voru engir farsímar undir hinu vinsæla vörumerki félagsins, iPhone, kynntir til sögunnar.

Þess í stað kynnti félagið nýjar iPad spjaldtölvur, Apple Watch snallúrin og áskriftarþjónustur, en nú er búist við að á nýboðuðum kynningarfundi verði upplýst um nýjustu farsímana í aðdraganda hátíðanna. Eins og Viðskiptablaðið fjallaði um á dögunum mynduðust biðlistar hér á landi eftir snjallúrunum en einnig hefur mikið verið talað um gott gengi hlutabréfa félagsins.

Þó gengi bréfa félagsins hafi lækkað það sem af er degi í dag um 1,14%, niður í 115,17 dali þegar þetta er skrifað, þá hefur gengi bréfa félagsins hækkað um 23% síðustu þrjá mánuði á sama tíma og Dow Jones Industrial Average vísitalan hafi hækkað um 7,2%.

Fjármálastjóri Apple, Luca Maestri staðfesti í júlí að Apple byggist við nokkurra vikna töfum á því að félagið myndi kynna nýjustu vörulínu sína af iPhone símum miðað við fyrra ár þegar félagið kynnti síma sína seint í september.

Stikkorð: iPad Apple iPhone Apple Watch snjallúr 5G farsímakerfi