*

laugardagur, 19. september 2020
Innlent 16. mars 2020 09:26

Arion lokar tveim útibúum í einu

Tímabundin lokun verður hjá Arion banka á höfuðborgarsvæðinu – opið á Bíldshöfða, í Smáranum og í stafrænu útibúi við Hagatorg.

Ritstjórn
Útibúi Arion banka í Borgartúni 18, gengt höfuðstöðvunum sem eru við Borgartún 19, verður tímabundið lokað af öryggisástæðum vegna Covid 19 veirufaraldursins.
Haraldur Guðjónsson

Sem varúðarráðstöfun verða tímabundið aðeins þrjú af fimm útibúum Arion banka á höfuðborgarsvæðinu opin hverju sinni, en í dag tók jafnframt gildi samkomubann vegna útbreiðslu Covid 19 veirunnar sem talin er vera uppruninn í Wuhan borg í Kína.

Arion banki segir öryggi viðskiptavina og starfsfólks ásamt því að tryggja þjónustu við viðskiptavini vera forgangsatriði og því sé gripið til þessara ráðstafanna. Viðskiptavinum á höfuðborgarsvæðinu sem þurfa að sækja þjónustu í útibúi er því bent á útibú Arion banka á Bíldshöfða í Reykjavík, í Smáranum í Kópavogi og stafrænt útibú við Hagatorg.

Útibú Arion banka í Borgartúni 18 og í Kringlunni verða lokuð tímabundið en sjálfsafgreiðsluvélar útibúanna verða áfram opnar og bjóða bæði upp á úttektir og innlagnir auk fjölda annarra aðgerða.

„Við bendum viðskiptavinum á kosti þess að nýta stafrænar þjónustuleiðir eins og Arion appið og netbankann og biðjum þá að takmarka komur í útibú eins og unnt er. Jafnframt  er hægt að hringja í þjónustuver bankans í síma 444 7000, þar sem aukinn fjöldi starfsfólks sinnir viðskiptavinum, og hafa samband við okkur í gegnum netspjall á www.arionbanki.is og í gegnum netfangið arionbanki@arionbanki.is. Fjármálaráðgjöf fer nú fram í gegnum síma en ekki í útibúum og er hægt að panta tíma á vef bankans,“ segir jafnframt i tilkynningu bankans.

„Viðskiptavinum sem sjá fram á erfiðleika við að standa skil á afborgunum íbúðarlána vegna Covid-19 og hyggjast nýta sér greiðsluhlé á afborgunum er bent á frekari upplýsingar á vef bankans. Einnig er þeim velkomið að  hafa samband í gegnum netfangið greidsluhle@arionbanki.is. Víð ítrekum öryggi þess að greiða með snertilausum lausnum, svo sem síma, greiðslukortum eða úri.“