Bryndís Hlöðversdóttir tók í dag formlega við stöðu rektors Háskólans á Bifröst.
Ennfremur urðu breytingar á stjórn Háskólans. Hrafnhildur Stefánsdóttir stjórnarformaður sagði sig úr stjórn og tilnefndu Samtök Atvinnulífsins Guðstein Einarsson í hennar stað. Hann var kjörinn stjórnarformaður á stjórnarfundi í dag. Jón Ólafsson, prófessor og forseti Félagsvísindadeildar, er nýr aðstoðarrektor skólans.
Þetta segir í fréttatilkynningu frá Háskólanum á Bifröst.
Úr fréttatilkynningu:
Í innsetningarræðu sinni fjallaði Bryndís um hlutverk háskóla á Íslandi, sérstöðu og mikilvægi þeirra í þjóðfélagsumræðu, sérstaklega á tímum eins og nú.
„Háskólafólk má ekki óttast að tjá sig um málefni líðandi stundar“.
Hlutverk háskólafólks væri einnig að hafa áhrif á það siðferði sem verður til í nýju umhverfi upplýsingaflæðis með tilkomu samskiptaleiða á borð við Facebook og upplýsingagátta á borð við Wikileaks.
„Við getum haft áhrif á það hvort lekinn leiði til þess að leyndin verði enn meiri, eða hvort hann leiði til þess að við tökum í ríkara mæli ákvarðanir sem þola dagsljósið“.
Bryndís kom einnig inn á umræðu um sameiningarmál á háskólastigi:
„Sameining háskólanna má ekki verða markmiðið sjálfrar sín vegna, hagræðing og skynsöm nýting á opinberum fjármunum til skólanna á að vera markmið, samhliða eflingu háskólastigsins sem slíks. Að niðurstaðan verði öflugri háskólar en við höfum í dag, ekki bara að skólarnir verði færri“.
„Við Íslendingar þurfum vissulega að sníða okkur stakk eftir vexti en í þessum efnum sem öðrum – en við þurfum einnig að gæta þess að standa vörð um sérstöðu skólanna og að falla ekki í þá gryfju að gera háskólana að fjöldaframleiðslueiningum, þar sem allir eru steyptir í sama mót“.
Að lokum þakkaði hún fyrrverandi nemendum skólans, Hollvinum, fyrir þann mikla stuðning sem þeir hafa sýnt á síðustu misserum. „Slíkur stuðningur er ómetanlegur og verður seint þakkaður“.