Fjárfestar vestanhafs voru einkar ásælnir í kaupréttarsamninga í byrjun árs í kringum Russel 2000 vísitöluna sem samanstendur af litlum og meðalstórum fyrirtækjum.
Samkvæmt Yahoo Finance er um að ræða eina vinsælustu stöðutöku ársins er fjárfestar voru framan af ári einkar bjartsýnir á vaxtalækkanir í ár.
Nú hefur þó hægst verulega á valréttarsamningum í kringum Russel 2000 en vísitalan hefur lækkað um 3% það sem af er ári samhliða því að S&P 500 hefur hækkað um 5% á árinu.
Lítil og meðalstór fyrirtæki eru mun háðari vaxtabreytingum en þau stærri en um 40% af skuldum þeirra er á breytilegum vöxtum samkvæmt greiningardeild Bank of America.
Þá eru flest minni fyrirtæki með stærri hlutfall af skammtímaskuldum sem þarf oftar en ekki að endurfjármagna í hávaxtaumhverfi en til samanburðar eru 75% af fyrirtækjum í S&P 500 með einungis langtímaskuldir á föstum vöxtum.
Fjárfestar og verðbréfamiðlarar voru því vongóðir á að lægri vextir myndu blása lífi í minni fyrirtæki og þar með Russel 2000 vísitöluna.
„Við teljum að vísitalan muni eiga erfitt uppdráttar á næstu mánuðum og í raun alveg fram að því að verðbólga fari að hjaðna og vextir byrja að lækka,“ segir Jill Carey Hall, fjárfestingaráðgjafi hjá Bank of American við Yahoo Finance.
„Vísitalan er miklu viðkvæmari fyrir stýrivöxtum og með endurfjármögnun fylgir áhætta hjá minni fyrirtækjum á meðan þau stærri eru með langtímaskuldir á föstum vöxtum. Því lengur sem vextir haldast háir því meiri áhætta er að þeir hafi áhrif á hagnað minni fyrirtækja“ bætir Hall við.