Arion banki auglýsti í Fréttablaðinu í síðustu viku verðbréfasjóði sem fólk getur fjárfest í, þar á meðal erlenda hlutabréfasjóði. Vegna gjaldeyrishafta er hins vegar óheimilt að fjárfesta í erlendum verðbréfum.
Flóki Halldórsson, framkvæmdastjóri Stefnis, sem er dótturfélag Arion banka, segir rétt að almennt geti fólk ekki keypt í erlendum verðbréfasjóðum vegna gjaldeyrishafta. Hins vegar geti þeir sem eiga erlendar eignir, t.a.m. erlenda hlutabréfa- og skuldabréfasjóði, selt þær eignir og endurfjárfest í erlendum hlutabréfasjóðum Stefnis. Endurfjárfestingin þurfi að eiga sér stað innan tveggja vikna frá sölu eldri eignar.
„Starfsemi sjóðanna er í grunninn alveg óbreytt frá því sem var fyrir hrun, fyrir utan þá staðreynd að nýfjárfesting er mjög takmörkuð vegna ríkjandi gjaldeyrishafta. Þessi hluti auglýsingarinnar var ætlaður þessum hópi og til að upplýsa þá sem þegar eiga í þessum sjóðum um hver ávöxtun síðastliðna tólf mánuði var,“ segir Flóki.