Hagnaður Vinnslustöðvarinnar á fyrstu sex mánuðum ársins nam 463 milljónum króna og jókst um 3% frá sama tímabili í fyrra þegar hann var 449 milljón króna. Heildartekjur félagsins voru 2.949 milljónir króna og jukust um tæp 29% frá sama tímabili í fyrra. Tekjur fiskvinnslu lækkuðu um 4,2% en tekjur útgerðar jukust lítillega, eða um 1,6%. Rekstrargjöld hækkuðu um 752 milljónir króna frá sama tímabili í fyrra, eða úr 1.527 í 2.279 milljón króna.
Rekstrargjöld fiskvinnslu breyttust lítið frá sama tímabili í fyrra en rekstrargjöld útgerðar hækkuðu um tæp 10%. Ástæða hækkunar rekstrartekna og gjalda er þó að langmestu leyti vegna endursölu félagsins á mjöli og lýsi, sem var ekki hafin á fyrri helmingi síðastliðins rekstrarárs.
Framlegð félagsins (hagnaður fyrir afskriftir og fjármagnsliði) nam rúmum 670 milljónum króna og dróst saman um 12% frá fyrra ári. Framlegðarhlutfall lækkaði úr 33,4% í fyrra í 22,7% í ár.
Veltufé frá rekstri nam 742 milljónum króna og var 25,2% af rekstrartekjum. Aukning veltufjár frá rekstri nam tæpum 12% frá fyrra ári, sem þá var 665 milljónir króna. Fjárfestingarhreyfingar nettó námu 645 milljónum króna. Vinnslustöðin hf. keypti 43% eignarhlut í Huginn ehf. á tímabilinu. Huginn ehf. gerir út uppsjávarfrystiskipið Huginn VE. Ásamt kaupunum á eignarhlut í félaginu keypti Vinnslustöðin hf. aflahlutdeild í loðnu, kolmunna og bolfiski af Huginn ehf. en seldi til félagsins aflahlutdeild í síld og norsk-íslenskri síld.
Afskriftir lækkuðu um 19 milljónir króna frá fyrra ári. Niðurstaða fjármagnsliða er jákvæð um tæpar 77 milljónir króna á þessu tímabili. Á sama tímabili í fyrra var hún neikvæð um 114 milljón króna. Fyrir utan áhrif styrkingar krónunnar á langtímalán félagsins á 1. ársfjórðungi þá seldi félagið gjaldmiðlaskiptasamning með miklum hagnaði, eins og nefnt var í tilkynningu um uppgjör 1. ársfjórðungs.
Reiknaðir skattar tímabilsins nema 101,6 milljón króna en voru engir á síðasta ári.