Hlutabréfaverð Alvotech opnaði 7% lægra í morgun og hefur lækkað um 1% til viðbótar í fyrstu viðskiptum. Gengi félagsins lækkaði um 8% í yfuir hálfs milljarðs viðskiptum í gær.
Gengi líftæknilyfjafélagsins stendur nú í 1745 krónum sem er 29% lægra en dagslokagengi félagsins fyrir mánuði síðan 26. febrúar.
Hlutabréfaverð Alvotech byrjaði að hækka undir lok síðasta árs en rauk síðan upp í janúar og febrúar þegar von var á niðurstöðu úttektar Lyfja- og matvælaeftirlits Bandaríkjanna (FDA) á framleiðslustöðu fyrirtækisins.
Rauk upp eftir 23 milljarða viðskipti
Þann 26. febrúar gekk Alvotech að tilboði frá hópi fagfjárfesta í almennra hlutabréfa í félaginu að verðmæti um 22,8 milljarðar króna á genginu 2.250 krónur á hlut. Dagslokagengi Alvotech eftir viðskiptin var 2.450 krónur og hafði þá aldrei verið hærra.
Samkvæmt ársuppgjöri 2023 tapaði Alvotech 551,7 milljónum Bandaríkjadala sem samsvarar 76 milljörðum króna á meðalgengi dals gagnvart krónu í fyrra. Mun það vera sambærilegt tap og árið 2022 þegar félagið skilaði 513,6 milljóna dala tapi sem samsvaraði 73 milljörðum á þáverandi gengi.
Spá töluverðri tekjuaukningu í ár
Heildartekjur líftæknilyfjafyrirtækisins á árinu námu 93,4 milljónum dala sem samsvarar um 13 milljörðum íslenskra króna, sem er 10% aukning frá fyrra ári.
Samkvæmt afkomuspá Alvotech fyrir árið 2024 er gert ráð fyrir að tekjur verði á bilinu 300- 400 milljónir dala í ár.
Í afkomuspánni er gert ráð fyrir að Simlandi, líftæknilyfjahliðstæða Alvotech sem hlaut markaðsleyfi í Bandaríkjunum og verður fyrsta hliðstæða við gigtarlyfið Humira, komi á markað á öðrum ársfjórðungi.
Þá er stefnt að því að koma AVT04, einstofna mótefni og líftæknilyfjahliðstæða við Stelara, á markað á fjórða ársfjórðungi.
Samkvæmt afkomuspánni er gert ráð fyrir að EBITDA félagsins verði á bilinu 59 til 150 milljónir dala árið 2024.
