*

mánudagur, 19. apríl 2021
Innlent 2. mars 2021 16:19

Icelandair rétti úr kútnum

Hlutabréf flugfélagsins höfðu lækkað um 6,5% um tíma í dag en enduðu daginn í aðeins 2,4% lækkun.

Ritstjórn
Kauphöllin, Nasdaq
Haraldur Guðjónsson

Úrvalsvísitalan lækkaði um eitt prósent í þriggja milljarða króna veltu Kauphallarinnar í dag. Fjórtán af nítján félögum hlutabréfamarkaðarins lækkuðu í viðskiptum dagsins.

Hlutabréf Icelandair lækkuðu um 2,4% í 201 milljón króna viðskiptum og standa nú í 1,43 krónum á hlut. Gengi félagsins fór lægst í 1,37 krónur á hlut í dag en hækkaði aftur rétt fyrir lokun Kauphallarinnar. Flugfélagið tilkynnti í dag um að tvær Boeing 737 MAX vélar verði teknar í rekstur á ný í mars en vélarnar hafa verið kyrrsettar í tæplega tvö ár.  

Mest lækkaði gengi Reita eða um 3% í 156 milljóna króna veltu. Fasteignafélagið hefur lækkað um 15% á tæpum þremur vikum. 

Fjögur félög hækkuðu í dag en það voru Iceland Seafood, Síminn, Sýn og TM. Af þeim hækkaði TM mest eða um 3,1%. Gengi Kviku stóð óbreytt í 18,7% í 211 milljóna króna viðskiptum. 

Mesta veltan var enn og aftur með bréf Arion banka sem lækkuðu um 1,8% í 556 milljóna króna viðskiptum og standa nú í 122,8 krónum á hlut. Næst mesta veltan var með hlutabréf Marel sem lækkuðu um eitt prósent í 406 milljóna króna veltu.