Ingibjörg Sverrisdóttir var kosin formaður Félags eldri borgara í Reykjavík og nágrenni með yfirburðum á aðalfundi félagsins í dag, sem haldinn var á Hótel Sögu. Fráfarandi formaður, Ellert B. Schram, gaf ekki kost á sér til endurkjörs.
Þeir Haukur Arnþórsson og Borgþór Kjærnested voru einnig í framboði til formanns. Framboð Ingibjargar hlaut 262 atkvæði eða 62% atkvæða á meðan framboð Hauks Arnþórssonar hlaut 131 atkvæði eða 30%. Þá hlaut framboð Borgþórs Kjærnested 29 atkvæði eða 6,8%. Alls greiddu 423 atkvæði á fundinum en eitt atkvæði var autt og ógilt.
„Kjör eldri borgara eiga hug minn allan og er ég bæði auðmjúk og þakklát fyrir það mikla traust sem mér var sýnt á fundinum í dag. Ég mun ekki láta mitt eftir liggja í baráttunni framundan fyrir bættum lífsgæðum eldra fólks,” segir Ingibjörg.
Haft var eftir Ingibjörgu í framboðsræðu hennar á fundinum að hennar áherslumál sneru að skerðingum og kjaramálum, húsnæðismálum, hjúkrunarheimilum og heimilisaðstoð
„Hópur eldri borgara býr svo sannarlega ekki við góð kjör. Kjaramál og skerðingar taka mikið rými í umræðunni og sérlega þessa dagana vegna uppgjörs frá Tryggingastofnun ríkisins sem barst um sl. mánaðarmót. Þetta þekkið þið flest, sem eruð hér inni. Mín áherslumál snúa að skerðingum og kjaramálum, húsnæðismálum, hjúkrunarheimilum og heimilisaðstoð,“ sagði Ingibjörg m.a. í ræðu sinni.
Ingibjörg er fædd í Reykjavík 24. mars 1947. Hún ólst upp í Reykjavík og Vestmannaeyjum en hún hefur starfað bæði erlendis og hérlendis. Hún starfaði síðast hjá Air Atlanta áður en hún fór á eftirlaun.
Ingibjörg stundaði tungumálanám í Þýskalandi og Spáni á yngri árum og á fullorðinsárum við Menntaskólann í Hamrahlíð og síðar við Háskóla Íslands í ferðamálafræðum. Hún hefur setið ótal ráðstefnur og endurmenntunarnámskeið í ýmsum greinum í tengslum við störf sín hverju sinni. Þá hefur Ingibjörg sinnt kennslu í þremur ferðamálaskólum hérlendis og kennt verðandi ferðaráðgjöfum.
