Eftir alls rúmlega 4 milljarða króna hreint innflæði í hlutabréfasjóði í desember og janúar var örlítið hreint útflæði úr sjóðunum í febrúar sl., eða alls 51 milljón króna. Alls seldust hlutadeildarskírteini fyrir tæplega 2,5 milljarða í síðasta mánuði á sama tíma og innlausn hlutdeildarskírteina nam rúmlega 2,5 milljörðum. Þetta kemur fram í tölum Seðlabanka Íslands um eignir verðbréfa- og fjárfestingasjóða sem birtar voru í morgun.
Eins og Viðskiptablaðið sagði frá nam hreint innflæði tæplega 2,1 milljarði í desember og var þá um að ræða mesta innflæði í hlutabréfasjóði í tvö ár. Um viðsnúning var að ræða í desember því í fjóra mánuði á undan hafði hreint útflæði samtals numið rúmlega 5,8 milljörðum króna.
Skuldabréfasjóðir virðast aftur á móti vera að sækja í sig veðrið því í síðasta mánuði nam hreint innflæði inn í sjóðina rúmlega 3 milljörðum króna. Þetta var annan mánuðinn í röð sem hreint innflæði var í skuldabréfasjóði en í janúar nam hreint innflæði rúmlega 1 milljarði króna. Fyrir þennan viðsnúning hafði verið stöðugt hreint útflæði úr skuldabréfasjóðum frá því í janúar 2023. Á síðasta ári nam hreint útflæði út úr skuldabréfasjóðum alls tæplega 49 milljörðum.
Flúðu hlutabréfasjóði í stórum stíl
Líkt og Viðskiptablaðið hefur fjallað um flúðu fjárfestar í stórum stíl hlutabréfasjóði á síðasta ári um leið og hlutabréfamarkaður gaf eftir. Aftur á móti voru teikn á lofti um betri tíð í nóvembertölum Seðlabankans því fjárfesting í hlutabréfasjóðum tók við sér í nóvember sl. eftir ansi magra mánuði á undan. Þannig nam sala hlutdeildarskírteina tæplega 1,2 milljörðum króna í nóvember eftir að hafa numið 314 milljónum í október, 267 milljónum í september og 372 milljónum í ágúst. Salan í nóvember var því meiri en til samans þrjá mánuðina á undan. Til marks um stemningsleysið umrædda þrjá mánuði náði fjárfesting í hlutabréfasjóðum sínum lægsta punkti í nærri 12 ár í september, eða frá því í október árið 2011.
Eins og löngu þekkt er orðið þrífast hlutabréfamarkaðir ekkert sérstaklega vel í mikilli verðbólgu og háu vaxtastigi líkt og ríkt hefur hér á landi undanfarin misseri. Umrætt ástand hefur einnig litað skuldabréfamarkaðinn og þar af leiðandi ávöxtun skuldabréfasjóða.
Þrátt fyrir aukna sölu hlutdeildarskírteina var útflæði meira en innflæði í hlutabréfasjóði í nóvember er útflæðið nam 2,3 milljörðum. Í október var útflæðið 1,7 milljarðar og 2,4 milljarðar í september.
Innlausn fjárfesta í hlutabréfasjóðum nam alls um 23,4 milljörðum króna á síðasta ári meðan sala hlutdeildarskírteina nam rétt rúmlega 15 milljörðum króna. Hreint útflæði nam því hátt í 8,3 milljörðum króna árið 2023 eftir að hafa verið um 8 milljarðar árið 2022.
