Guðmundur Fertram Sigurjónsson, stofnandi og forstjóri Kerecis, bauð sig ekki fram til endurkjörs á aðalfundi sparisjóðsins indó sem fram fór í dag, en hann hefur verið stjórnarformaður félagsins síðastliðinn tvö ár.
Hann kveður tveggja ára stjórnarsetuna með stolti enda kom hann að því að ýta fyrirtækinu úr vör en nú sé það annarra að fylgja því inn á nýtt æviskeið.
„Þetta er bara svo stórt og mikið verkefni. Ég er auðvitað enn að vinna í Kerecis. Indó er núna komið frá því að vera nýsköpunarfyrirtæki yfir í að vera með um 50 þúsund viðskiptavini,“ segir Guðmundur Fertram spurður um ákvörðun sína.
„Þannig ég lít svo á að ég hafi komið að því að ýta fyrirtækinu úr vör og nú er annarra að taka það áfram,“ bætir hann við.
Indó sótti sér nýverið milljarð með hlutafjáraukningu til að fjármagna næsta legg í innreið sinni á íslenskan fjármálamarkað, yfirdráttarlán.
„Ég auðvitað fjárfesti í félaginu og tók þátt í þessari milljarðs hlutafjáraukningu,“ segir Guðmundur Fertram sem verður áfram hluthafi.
„Ég mun halda áfram að bakka fyrirtækið upp,“ segir hann. Guðmundur Fertram hefur fjárfest töluvert upp á síðkastið og segist ætla að halda því áfram. „En ég hef ekki hugsað mér að vera sérfræðingur í stjórnarsetum þannig séð.“
Benedikt Arnarsson, framkvæmdastjóri Logos, kemur inn í stjórnina í stað Guðmundar en hann segir það mjög jákvætt fyrir indó að fá Benedikt inn.
„Frá mínum bæjardyrum séð þá er þetta stórt og mikið verkefni. Þetta er hraðast vaxandi banki landsins og það er ekki hægt að vera í stjórn í hjáverkum. Það er stórt og alvarlegt mál enda er þetta er eftirlitsskylt fyrirtæki. Nú kemur Benedikt þarna inn í minn stað sem er einn af færustu lögmönnum landsins og fylgir þessu inn í sitt næsta æviskeið,“ segir Guðmundur Fertram að lokum.