Hlutabréfaverð Trump Media & Technology Group Corp., sem sameinaðist sérhæfðu yfirtökufélagi fyrir helgi, hækkaði um 16% á fyrsta viðskipadegi.
Dagslokagengi félagsins var um 58 Bandaríkjadalir sem gerir markaðsvirði félagsins um 8 milljarða Bandaríkjadala. Stærsta eign TMTG er samfélagsmiðillinn Truth Social sem Donald Trump, fyrrverandi Bandaríkjaforseti, stofnaði árið 2021.
Hlutur Trump í félaginu er nú metinn á 4,5 milljarða dala sem er um 672 milljarðar íslenskra króna á gengi dagsins.
Félagið hefur fengið auðkennið DJT á Nasdaq sem eru upphafsstafir Trump en skömmu eftir að fyrstu viðskipti voru hringd inn í Nasdaq í gær hækkaði gengið um 59%.
Markaðsvirði fjölmiðlafyrirtækisins sé miðað við dagslokagengið er nú sambærilegt og U.S Steel og Skechers.
Tímasetningin gæti ekki verið betri fyrir Trump samkvæmt The Wall Street Journal en hann þarf að greiða 175 milljónir dala í tryggingu fyrir sekt vegna fjársvikamáls í New York. Tryggingin gefur Trump færi á að áfrýja málinu en ef hann tapar málinu þarf að greiða 454 milljóna dala sektina að fullu.
Það gæti þó reynst þrautinni þyngri fyrir Trump að koma bréfunum í verð. Samkvæmt venju er eigendum félaga sem taka þátt í að sameinast sérhæfðu yfirtökufélagi meinað að selja í hinu sameinaða félaga í hálft ár til að forðast gengishrun.
Sjö manna stjórn félagsins gæti þó veitt Trump undanþágu til þess að losa hluta af bréfum sínum ef hann óskar eftir því. Samkvæmt WSJ hefur það verið gert áður en þó aldrei fyrr en mánuði eftir fyrsta viðskiptadag.
Fjárfestar í félaginu gætu tapað töluverðum fjárhæðum ef Trump byrjar að selja þar sem markaðsvirði félagsins er mun hærra en undirliggjandi virði félagsins.
„Enginn veit í raun hvað mun gerast, en það verður allavega áhugavert að fylgjast með þessu,“ segir Kristi Marvin, stofnandi SPACInsider, í samtali við WSJ.
Ef stjórn TMTG myndi samþykkja beiðni Trump að byrja að selja bréfin eru samþykktir innan félagsins sem setja honum skorður um hversu mikið magn bréfa hann má losa. Samkvæmt WSJ gæti Trump engu að síður losað bréf fyrir hundruðum milljóna dala á þriggja mánaða tímabili.
Sjö manna stjórn félagsins er einstaklega hliðholl Trump en hún er samansett af fjölskyldu og vinum. Donald Trump Jr., sonur forsetans fyrrverandi, og þrír ráðherrar úr ríkisstjórn hans eru meðal annars í stjórninni.
Þó að því fylgi töluverð áhætta fyrir félagið að leyfa stærsta hluthafanum að byrja selja bréf skömmu eftir skráningu er þá eru stuðningsmenn Trump eina ástæðan fyrir því að gengi félagsins sé svona hátt.
Hlutabréfaverð SPAC-félagsins sem sameinaðist samfélagsmiðlinum hækkaði um 35% á mánudaginn. Því er ekki ólíklegt að margir stuðningsmenn Trump myndu reyna að halda í bréfin sín og halda genginu uppi, byrji hann að selja bréf.
