Búvörusamningur um starfssemi nautgriparæktar sem ríkisstjórnin undirritaði fyrir helgi veitir ostaframleiðendum aukna tollvernd og hefur það að markmiði að gera raunverð hið sama og gilti í júní 1995. Frá þessu er sagt á vef Félags atvinnurekenda (FA).
Þá var tímapunkturinn 1995 valinn vegna þess að þá tók GATT-samningur Alþjóðaviðskiptastofnunarinnar, eða WTO, gildi á Íslandi. Þar til þá hafði verið bannað að flytja inn hinar ýmsu búvörur en með gildistökunni var innflutningurinn leyfður. Í stað innflutningsbanns komu þá tollar, sem voru að sögn FA nægilega háir til að varna mönnum frá því að láta sér detta í hug að hefja innflutning í viðskiptaskyni.
FA spyr í grein sinni um málið hvort ekki sé skynsamlegt að uppreikna um leið innflutningsheimildir á lægri tollum sem miðuðust við 5% af innanlandsneyslu eins og hún var 1986-1988 þegar GATT-samningurinn fyrrnefndi tók gildi. Þá væri til að mynda hægt að flytja inn tæplega 300 tonn af osti á lægri tollum í stað þeirra rúmlega 100 sem leyfilegt er að flytja inn undir núverandi tollaskilyrðum.
