„Það má gera ráð fyrir því að lækkun á kröfu óverðtryggðra skuldabréfa og hækkun á verðtryggðum sem hefur verið í gangi undanfarið muni snúast við þar sem verðbólga er meiri en menn spáðu,“ segir Brynja Hjálmtýsdóttir, fjárfestingastjóri hjá Auði Capital.
Spár gerðu ráð fyrir lítilsháttar hækkun vísitölu í júní og að draga myndi úr tólf mánaða verðbólgu í mánuðinum. Flestir greiningaraðilar reiknuðu með að ársverðbólga myndi fara úr 5,4% í 4,9%. Niðurstaðan var hins vegar sú að árs verðbólgan stóð í stað á milli mánaða. Brynja bendir á að búist sé við því að draga muni úr verðbólgu í næsta mánuði og því spurning hversu langvinn áhrifin verði á markaðnum.
Hún segir hækkun á flugfargjöldum og matvöru einkennilega í ljósi þess að verð á eldsneyti, ekki síst flugvélaeldsneyti, hafi lækkað mikið upp á síðkastið og samkeppni aukist í millilandaflugi. Þá hafi krónan styrkst sem hafi átt að skila sér í lægra matvöruverði. Þvert á móti hækkaði verð á flugfargjöldum um 11% á milli mánaða og matvöru um 1,1%.
„Gengisþróunin þýðir að innkaupsverð matvöru ætti að vera að lækka. Kaupmenn virðast hins vegar vera að taka til sín alla hækkun af sterkara gengi,“ segir hún.
Hér má sjá 12 mánaða verðbólguþróun síðastliðin fimm ár.