Verðmæti eignasafns Kaupþings banka jókst um 119 milljarða króna að raunvirði á fyrri helmingi árs 2010. Er það hækkun um 15% frá áramótum. Þetta kemur fram í nýjum fjárhagsupplýsingum skilanefndar Kaupþings.

Hækkun á verðmæti eignasafnsins hefur verið leiðrétt fyrir áhrifum vegna 9% styrkingar á gengi krónunnar á tímabilinu. Nafnvirði heildareigna nemur 2.650 milljörðum króna í lok árshlutahelmingsins en óveðsettar eignir bankans eru metnar á 833 milljarða króna.

Steinar Þór Guðgeirsson, formaður skilanefndar Kaupþings, segist ánægður með árangurinn á árinu og býst við betri endurheimtum en áður. „Við erum ánægð með árangurinn á árinu. Skilanefnd Kaupþings hefur haldið áfram á þeirri braut sem mörkuð var í október 2008: Að styðja við eignir þar til markaðsaðstæður yrðu hagstæðari eða viðunandi verð fengist fyrir þær eða eftir atvikum bíða eftir efndatíma á útistandandi lánum. Lánasafnið er nú komið í gott horf og við búumst við betri endurheimtum en áður. Jafnframt er mikil virðisaukning í þeim erlendu félögum sem við höfum endurskipulagt,“ segir Steinar.

Breytingar á verðmæti eignasafnsins má að mestu rekja til aukningar á verðmæti eignarhluta bankans í ýmsum félögum sem hefur frá áramótum aukist um tæplega 34 milljarða króna. Virði dótturfélaga hefur einnig aukuist, um 23 milljarða króna, og virði lánasafns bankans hækkað um 18 milljarða króna.

800 milljóna króna tekjur af starfseminni

Þóknanatekjur af lánasafni bankans námu rúmum 800 milljónum króna á fyrstu sex mánuðum ársins. Tekjurnar standa straum af nær öllum rekstrarkostnaði Kaupþings utan aðkeyptrar sérfræðiþjónustu. Þóknanatekjur á árinu 2009 voru um 1.300 milljónir króna.

435 milljónir króna renna til ríkissjóðs

Kaupþing greiddi um 435 milljónir króna í skatt á tímabilinu en heildarkostnaður við rekstur Kaupþings banka á fyrstu sex mánuðum ársins var 3,7 milljarðar króna. Það er 0,28% af virði heildareigna. Skattgreiðslur nema 12% af heildarkostnaði.

Stærstur hluti kostnaðar er tilkominn vegna aðkeyptrar sérfræðiráðgjafar, rúmir 2,7 milljarðar króna. „Helstu útgjöld koma til vegna erlendra fjármálaráðgjafa bankans, vinnu við endurheimtuaðgerðir erlendis og uppgjör á afleiðusafni bankans,“ segir í tilkynningu.

Málshöfðun og lagaleg úrræði tryggja best endurheimtur

„Mikil áhersla hefur verið lögð á vinnu við endurheimtur vegna lána og viðskipta til félaga sem hafa engan undirliggjandi rekstur. Mörg þessara mála hafa það sameiginlegt að málshöfðun og önnur lagaleg úrræði tryggja best endurheimtur fyrir bankann. Sú vinna hefur nú þegar skilað góðum árangri í þágu kröfuhafa bankans og hefur tekist í fjölmörgum málum að verja stöðu bankans, tryggja endurheimtur og koma í veg fyrir rýrnun eigna. Vinna við rannsókn og endurheimtur mála af þessu tagi hefur staðið yfir frá haustinu 2008 og krefst mikillar samvinnu við alþjóðleg lögfræði- og endurskoðunarfyriræki sem skýrir að stórum hluta kostnað vegna aðkeyptrar sérfræðiþjónustu,“ segir í tilkynningu frá skilanefnd Kaupþings.

Handbært fé Kaupþings banka var 195 milljarðar króna í lok tímabilsins og jókst um 19 milljarða frá áramótum. Á árunum 2008 og 2009 greiddi skilanefnd bankans um 130 milljarða króna til innistæðueigenda hjá útibúum Kaupþings í Þýskalandi, Noregi, Svíþjóð, Finnlandi og Austurríki. Þannig gerði bankinn upp allar innistæður í útibúum bankans erlendis.