Indriði Ingi Stefánsson og Björn Leví Gunnarsson þingmenn Pírata hafa lagt fram þingsályktunartillögu um að fela fjármála- og efnahagsráðherra að leggja til breytingar á skatta- og tollalöggjöf svo að gullstangir verði undanþegnar virðisaukaskatti og tollum.
Í þingsályktunartillögunni sé breytingin gerð með það fyrir augum að fjölga sparnaðarmöguleikum almennings. Fjármálaráðherra myndi leggja fram frumvarp til laga til að ná þessu fram á vorþingi 2025.
„Almenningur víða um heim leitar í sparnað í gulli til að dreifa áhættu. Vegna íslenskrar skatta- og tollalöggjafar er slíkt í raun ómögulegt þar sem strax verður nokkurt tap. Ekki verður séð að hægt sé að færa rök fyrir því að sparnaður í gulli ætti ekki að standa Íslendingum til boða,” segir í tillögunni.
„Ekki þarf að vernda neina íslenska gullvinnslu og ekki verður til verulegur virðisauki í íslensku hagkerfi þegar gull er unnið í skartgripi, borðbúnað eða aðra vöru. Hér er lögð til sjálfsögð breyting sem ætti að veita almenningi frelsi til sparnaðar til jafns við aðrar þjóðir,” segir þar enn fremur.