Nýr og spennandi EQE SUV verður heimsfrumsýndur 16. október næstkomandi. EQE SUV er því viðbót í vörulínuna en lúxusjeppinn er byggður á stórum og hátæknivæddum undirvagni frá Mercedes-EQ en fyrr í sumar kom EQE fólksbíllinn til landsins og hefur vakið mikla athygli fyrir fagurt útlit.
EQE SUV er með stafrænt stjórnrými með hátæknivæddum MBUX stýrikerfi. Bíllinn verður einnig fáanlegur með hinum hátæknivædda Hyperscreen, líkt og er í EQS lúxusfólksbílnum. Hyperscreen er háskerpuskjár frá Mercedes-Benz sem teygir anga sýna yfir allt mælaborðið enda 55 tommur með einu samfelldu bogadregnu gleri.
EQE SUV er með hágæða efnisval og innréttingar þar sem þægindi og lúxus eru í fyrirrúmi. LED umhverfislýsing í innanrýminu í 64 litum gerir mikið fyrir stemmninguna og sætin eru afar þægileg. Burmester hljómkerfið býður síðan upp á það besta í tónlistarupplifun í bílnum. Segja má að innanrýmið í bílnum sé alveg einstakt með þessum mikla lúxus og engum ætti að leiðast með alla þessa tækni innanborðs.
