„Ég er að taka við vildarkerfinu sem er fjölmennasta og stærsta vildarkerfi á landinu með 75 þúsund notendur,“ segir Hugi Halldórsson nýr viðskiptastjóri Vildarkerfis Samkaupa. „Þetta er mikil áskorun þar sem þetta er svo stórt og mikið.“
Samkaup reka 60 verslanir víðs vegar um landið undir merkjum Nettó, Krambúðarinnar, Kjörbúðarinnar og Iceland. Hjá félaginu starfa um 1250 starfsmenn í rúmlega 660 stöðugildum.
Að sögn Huga fá meðlimir í vildarkerfinu ýmsa afslætti gegnum smáforrit félagsins en Hugi mun einnig koma að markaðssetningu á þeim kjörum notendum stendur til boða. „Þetta snertir mörg svið innan Samkaupa. Ég mun starfa með sölu- og markaðsstjórum Nettó, Krambúðarinnar, Iceland og Kjörbúðarinnar. Þannig ég mun vinna þvert á verslunarsviðin með öllu þessu fólki sem er spennandi.“
„Ég mun gera mitt besta til að bjóða sem bestu kjör fyrir þá sem nota appið. Þetta snýr um að laða bæði fólk að og halda því,“ segir Hugi og bætir við að það sé löngu orðið ljóst að framtíðin er stafræn.
Hugi var áður deildarstjóri hjá Vodafone, starfaði í markaðsdeildinni hjá Play og síðan markaðsstjóri Ísorku.
Hann segir að öll sú reynsla muni nýtast sér í starfi. „Þetta er í rauninni alltaf bara þjónusta við viðskiptavini og markaðsstarf. Ég held að reynslan mín muni nýtast í þessu og síðan er ég annálaður punktaperri,“ segir Hugi og hlær. „Ég safna punktum út um allt.“
Hann segir þetta snúist fyrst og fremst um að fólk sjái ávinning í því að nota smáforrit Samkaupa. „Að það sé stanslaust eitthvað nýtt. Reynslan mín mun nýtast best í markaðssetja kjörin út á við. Þetta er svona markaðs- og sölustarf í grunninn.“
Spurður um hvað honum finnst skemmtilegast að gera utan vinnu segir Hugi það auðsvarað. „Það er að fara erlendis. Ég fer mikið erlendis. Ég hef stundum samt talið að það sé rannsóknarefni fyrri raunvísindadeildar Háskóla Íslands að finna út úr því af hverju ég fer svona mikið erlendis. Öll ferðalög erlendis,“ segir Hugi léttur.
„Ég ætlaði að verða forseti þegar ég var lítill til að geta heimsótt öll löndin í heiminum og ætli ég sé ekki enn að reyna að uppfylla þann draum. Ég er ekki hálfnaður en er kominn með 53 lönd undir beltið,“ segir Hugi. Spurður um hver sé uppáhalds ferðastaðurinn, segir Hugi Bandaríkin vera rosalega skemmtilegt land. „En ég finn mestu róna þegar ég fer til Sikiley. Ég flyt rauðvín inn þaðan. Þannig það er best að hlaða batteríin þar,“ segir Hugi.
Nánar er fjallað um málið í Viðskiptablaðinu. Áskrifendur geta nálgast viðtalið í heild hér.