Ökonomía, félag hagfræðinema við Háskóla Íslands, hefur ákveðið í tilefni 20 ára afmælis hagfræðikennslu í háskólanum, að færa öllum alþingismönnum eintak af bókinni Hagfræði í hnotskurn að gjöf.
Þetta kemur fram í tilkynningu frá Ökonomíu, félagi hagfræðinema við HÍ.
Bókin er eftir Henry Hazlitt og kemur er nú endurútgefin í þýðingu Haraldar Johannessen, ritstjóra Viðskiptablaðsins. Bókin kom fyrst út árið 1946 og nefnist á frummálinu Economics in One Lesson .
Rannsóknarmiðstöð um samfélags- og efnahagsmál (RSE) gaf bókina út í vikunni.
„Hagfræðinemar vilja með þessu benda á mikilvægi þess að sú grundvallarhugsun, sem birtist í bókinni, sé leiðarljós við stefnumótun og ákvarðanatöku á Alþingi,“ segir í tilkynningunni.
Þá vísar félagið til orða höfundar: „Hagfræðin felst í því að líta ekki aðeins á skammtímaáhrif stefnu eða ákvarðana heldur einnig á langtímaáhrifin, og að skoða afleiðingarnar ekki bara fyrir einn hóp heldur alla hópa.“
Í tilkynningunni kemur fram að þetta er klassískt rit um um grundvallaratriði hagfræðinnar, ritað á alþýðlegan hátt og á jafnmikið erindi í dag og þegar það kom fyrst út.
„Hazlitt var blaðamaður, sjálfmenntaður í hagfræði og talinn hafa til að bera framúrskarandi skilning á hagfræði, sem honum var einkar lagið að setja fram á máli sem allir skildu, lærðir sem leikir,“ segir í tilkynningunni.
„Stjórn Ökonomíu telur að þessi viðhorf eigi sérstakt erindi við kjörna fulltrúa á Alþingi nú, því hætta sé á skammtímaviðhorfum og sérhagsmunagæslu við erfiðar aðstæður eins og þær sem nú eru uppi í íslensku samfélagi.“
Stjórn nemendarfélagsins mun afhenda forseta Alþingis 63 eintök bókarinnar á skrifstofu hans miðvikudaginn 12. nóvember kl.15:30.
