Hlutabréfaverð Alvotech fór undir 2.000 krónurnar í fyrsta sinn frá því að félagið fékk markaðsleyfi fyrir líftæknilyfjahliðstæðu við gigtarlyfið Humira í lok febrúar.
Gengi félagsins hefur verið hærra en 2.000 krónur frá lok janúar þegar markaðsaðilar áttu von á niðurstöðu úttektar Lyfja og matvælaeftirlits Bandaríkjanna á framleiðsluaðstöðu félagsins.
Um 22% lækkun sl. mánuð
Hlutabréfaverð Alvotech náði sínu hæsta gildi þann 26. febrúar eftir að hópur fagfjárfesta keypti bréf í félaginu fyrir 23 milljarða króna í utanþingsviðskiptum.
Dagslokagengi Alvotech stóð þá í 2.450 krónum en hefur lækkað um rúm 22% síðan þá, sé miðað við dagslokagengið í dag. Gengi Alvotech lækkaði um 8% í yfir hálfs milljarðs veltu í dag.
Töluverður söluþrýstingur var á markaði í dag sem kom mörgum markaðsaðilum á óvart.
Gengi málmleitarfélagsins Amaroq minerals fór niður um tæp 6% í 137 milljón króna viðskiptum. Amaroq birtir ársuppgjör eftir lokun markaða á morgun.
Flugfélögin taka dýfu
Hlutabréfaverð Icelandair lækkaði um 3% og var dagslokagengið 1,07 króna. Gengi Play fór niður um 8% í 6 milljón króna viðskiptum og var dagslokagengið 4,5 krónur.
Gengi Kaldalóns lækkaði um 3% á meðan gengi Kviku banka fór niður um tæp 3% í 282 milljón króna viðskiptum.
Hlutabréf í Sýn og Skaga voru þau einu sem hækkuðu í viðskiptum dagsins en hvorugt félag hækkaði meira en 1% í viðskiptum dagsins.
Úrvalsvísitalan OMXI 15 fór niður um 1,85% og var heildarvelta á markaði 3,4 milljarðar.
