*

fimmtudagur, 27. júní 2019
Innlent 27. maí 2019 09:23

Ármann fer úr forstjórastóli Kviku

Ármann Þorvaldsson forstjóri Kviku skiptir um starf við Marinó Örn Tryggvason aðstoðarforstjóra bankans.

Ritstjórn
Ármann Þorvaldsson, fráfarandi orstjóri Kviku banka.
Aðsend mynd

Ármann Þorvaldsson mun hætta sem forstjóri Kviku og verða aðstoðarforstjóra bankans að eigin ósk.  Marinó Örn Tryggvason mun taka við sem forstjóri Kviku, en hann hefur gegnt stöðu aðstoðarforstjóra frá 2017.

Starf Ármanns mun í framhaldinu einskorðast við uppbyggingu viðskiptatengsla, þróun viðskiptatækifæra og að styðja við áframhaldandi uppbyggingu á starfsemi bankans í Bretlandi.

Kristín Pétursdóttir, stjórnarformaður Kviku segir að komið sé að ákveðnum tímamótum hjá Kviku, þegar tvö ár séu liðin frá því að Ármann og Marinó hófu störf hjá bankanum. „Ármann óskaði fyrir stuttu eftir því að breyta starfsskyldum sínum og það leiddi til þeirrar niðurstöðu að Ármann og Marinó skipta um hlutverk. Þeir hafa unnið vel saman og byggt upp, ásamt öðrum stjórnendum og starfsmönnum, öflugan banka. Ármann mun sinna daglegum rekstri í minna mæli en Marinó hefur gert en þess í stað einbeita sér að öflun viðskiptatækifæra. Ég vænti þess að breytingarnar leiði til enn aukinnar áherslu á tekjuöflun, auk þess sem reynsla og þekking Marinós mun nýtast vel í áframhaldandi uppbyggingu bankans,“ segir Kristín

Ármann Þorvaldsson segir starfið hafa verið afar ánægjulegt. „Skráning á markað og þær sameiningar sem bankinn hefur ráðist í hafa gengið vonum framar og góð rekstrarniðurstaða hefur skilað sér í prýðilegri ávöxtun hluthafa bankans á þessu tímabili. Á sama tíma hefur verið lagður grunnur að ýmsum spennandi verkefnum sem geta skapað verðmæti fyrir hluthafa bankans á næstu misserum. Forstjórastarf í banka felur í sér umtalsverðar stjórnunarlegar skyldur sem ég hef ekki áhuga á að sinna til langframa. Hins vegar hef ég mikinn áhuga á að starfa áfram með því frábæra fólki sem vinnur hjá Kviku og vil einbeita mér að verkefnum sem snúa að því að styrkja tengsl við viðskiptavini og þróa viðskiptatækifæri. Uppbyggingin á starfsemi bankans í Bretlandi hefur gengið mjög vel á undanförnum árum og ljóst að þar eru sóknartækifæri til framtíðar fyrir Kviku. Með þessari breytingu tel ég að hægt sé að nýta betur reynslu mína, þekkingu og tengsl í Bretlandi til þess að styðja við áframhaldandi vöxt þar. Ég fagna því mjög að geta starfað áfram með nýjum forstjóra, Marinó Erni Tryggvasyni, en samstarf okkar hingað til hefur gengið frábærlega og ég tel að hann muni leiða bankann farsællega,“ er haft eftir Ármanni í tilkynningu frá bankanum.

Marinó Örn Tryggvason hlakkar til að taka við nýju starfi. Hann starfaði áður hjá Arion banka og forvera hans frá árinu 2002. Marinó er með BSc í viðskiptafræði frá Háskóla Íslands og hefur lokið prófi í verðbréfaviðskiptum. „Á undanförnum tveimur árum hefur verið sérstaklega gefandi að kynnast og vinna með starfsmönnum bankans. Hjá Kviku starfar hópur öflugra starfsmanna sem verður gaman að starfa áfram með. Starfsumhverfi fjármálafyrirtækja er að breytast og Kvika er í einstakri stöðu til þess að nýta tækifæri framtíðarinnar. Það er spennandi verkefni að halda áfram að byggja upp öflugt fjármálafyrirtæki með stjórn og starfsmönnum bankans,“ er haft eftir Marínó.

25 ára afmælistilboð VB – 50% afsláttur af áskrift

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti.
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir í 4 mánuði. Áskrifendur fá Viðskiptablaðið, Frjálsa verslun og Fiskifréttir sent ásamt vefaðgangi að vb.is og fiskifrettir.is