Boðað hefur verið til verkfallsaðgerða í 17 kjaradeilum það sem af er ári. Á bak við þær standa um 9.300 einstaklingar. Aðgerðunum var frestað eða þeim aflýst í nokkrum tilfellum.
Fram kemur í Morgunblaðinu í dag að samkvæmt upplýsingum frá Samtökum atvinnulífsins eigi um 140 þúsund manns hér á landi aðild að stéttarfélagi. Það jafngildir þvi að 6,6% þeirra hafi boðað til verkfallsaðgerða á árinu. Af deilunum 17 er ósamið í sex málum.
Halldór Grönvold, aðstoðarframkvæmdastjóri Alþýðusambands Íslands (ASÍ), segir í samtali við blaðið sambærilega stöðu og þá sem nú sé komin upp ekki hafa sést frá því þjóðarsáttarsamningarnir voru gerðir árið 1990. Hann segir að merkja megi afleiðingar hrunsins í kjaraviðræðum vetrarins.