Borgarráð Reykjavíkur úthlutaði í gær lóð í Vatnsmýri til Háskóla Íslands og Vísindagarða. Vísindagarðar munu leigja lóðina út til byggingaraðila sem munu reisa frumkvöðla- og nýsköpunarsetur þar sem CCP mun meðal annars vera með nýjar höfuðstöðvar. Þetta kemur fram í vikulegum pistli borgarstjóra í dag.
Frumkvöðla- og nýsköpunarsetrið verður það stærsta á landinu.
„Talsvert hefur verið fjallað um þetta mál en hugmyndin um CCP í Vatnsmýri er gamall draumur sem er að verða að veruleika,“ segir í pistlinum. „Það sem er merkilegt við þessa uppbyggingu er að CCP mun aðeins notast við um fjórðung húsnæðisins - en hinum verður ráðstafað til annarra sprotafyrirtækja og frumkvöðla sem búnar verða kjöraðstæður í skapandi umhverfi.“
„Auk þess er gert ráð fyrir verslun og þjónustu á jarðhæðum. Alls eru heimildir til þess að reisa um 17.000 fermetra hús þarna og er óhætt að segja að Vísíndaþorpið í Vatnsmýri sé farið að taka á sig mynd. Áætlað er að framkvæmdir hefjist fljótlega á nýju ári og verði lokið innan þriggja ára. Þetta spennandi risaverkefni verður svo kynnt betur fljótlega.“