Bandaríski drykkjarframleiðandinn Coca Cola tilkynnti í fyrra að fyrirtækið ætlaði að prófa hið eina sanna kók með náttúrulega sætuefninu stevía, auk sykurs. Í framhaldinu kom Coca Cola Life á markað í Argentínu.
Samkvæmt frétt Wall Street Journal hyggst Coca Cola nú fara með drykkinn á markað í Bretlandi. Drykkurinn inniheldur 36% minna af hitaeiningum í en venjulegt Coke.
Vekur þetta athygli því forstjóri aðalkeppinautsins Pepsi Cola, Indra Nooyi, hefur sagt að stevía virki ekki vel í kóladrykki.
Þessu eru forsvarsmenn Coca Cola greinilega ósammála. Þegar hefur Coca Cola notað stevíu í Sprite og vítamínbætta drykki sem fyrirtækið framleiðir.
Hvað er stevía?
Jurtin Stevia rebaudina hefur verið notuð um aldir í Paragvæ. Í Suður-Ameríku er jurtin þekkt undir nafninu sætujurt. Frá Suður-Ameríku hefur hún borist til margra landa í Asíu og er sæta úr Stevíujurtinni mikið notuð í Kína og Japan.
Stevíusæta hefur verið notuð i Bandaríkjunum og í Asíu um áratugaskeið og var viðurkennd af Evrópusambandinu árið 2011 sem sætuauki í matvæli.
Stevíusæta er 100 til 300 sinnum sætari en sykur, er kaloríulaus með öllu, hefur ekki áhrif á blóðsykur og veldur ekki tannskemmdum.