Davíð Oddsson, formaður bankaráðs Seðlabankans staðfesti á blaðamannafundi fyrir stundu að stýrivaxta hækkun bankans í morgun væri til komin af kröfu Alþjóðagjaldeyrissjóðsins (IMF).
Eins og Viðskiptablaðið greindi frá í morgun var stýrivaxtahækkun seðlabankans í morgun að öllum líkindum runnin undan rifjum Alþjóðagjaldeyrissjóðsins (IMF) að mati Bjarke Roed-Frederiksen, hagfræðings hjá Nordea.
Þá sagði Davíð á blaðamannafundinum að ákvörðunin í morgun fæli ekki í sér að frekari stýrivaxtahækkanir væru framundan.
Í tilkynningu frá Seðlabankanum kemur fram að í því samkomulagi sem ríkisstjórnin gerði við sendinefnd IMF og lagt verður fyrir framkvæmdastjórn hans til staðfestingar á næstu dögum, felst meðal annars að Seðlabankinn skuli þá hafa hækkað stýrivexti í 18%.
Þá kemur fram að stýrivaxtalækkun bankans frá því um miðjan október, þegar stýrivextir voru lækkaðir í 12%, hafi verið rökstudd með breyttum aðstæðum í íslenskum efnahagsbúskap. Samdráttur væri þegar orðinn nokkur og meiri framundan og eftirspurn og væntingar hefðu hríðfallið.
„Mikilvægt er að koma gjaldeyrisviðskiptum á ný í eðlilegt horf og styðja við gengi krónunnar,“ segir í tilkynningu Seðlabankans.
„Þótt raungengið sé nú mun lægra en fær staðist til lengdar er talið óhjákvæmilegt að styrkja grundvöll krónunnar á gjaldeyrismarkaði með aðhaldssömu vaxtastigi þegar hömlur á gjaldeyrisviðskiptum verða afnumdar í áföngum. Neikvæðir raunvextir gætu veikt þann grundvöll. Samdráttur eftirspurnar mun leiða til þess að afgangur myndast fljótt á vöru- og þjónustuviðskiptum við útlönd. Framleiðsluslaki og jafnvægi eða afgangur í utanríkisviðskiptum munu stuðla að hækkun á gengi krónunnar að því tilskildu að traust hafi skapast á gjaldeyrismarkaði. Gangi spár eftir verða stýrivextir lækkaðir í samræmi við hratt lækkandi verðbólgu.“
