Þingsályktunartillaga Gunnars Braga Sveinssonar utanríkisráðherra, um að draga til baka aðildarumsókn Íslands að Evrópusambandinu, var lögð fram nokkrum dögum eftir að skýrsla Hagfræðastofnunar um aðildarviðræðurnar var gerð opinber. Þetta var meðal annars gagnrýnt af stjórnarandstöðunni.
Í útvarpsþættinum Sprengisandi á Bylgjunni í dag sagði Bjarni Benediktsson, fjármálaráðherra og formaður Sjálfstæðisflokksins:
„Ég held að það sé öllum ljóst að það hafi verið farið fullbratt á eftir skýrslunni fram með tillöguna. Ég hef skilning á því að mönnum þykir sem að skýrslan hafi ekki fengið nægilega umræðu áður en tillagan kemur fram. Það er hins vegar ekkert nema eðlilegt að ríkisstjórnin geri grein fyrir vilja sínum í málinu, eins og í raun er verið að gera með þessari þingsályktunartillögu."
„Það hefði mögulega mátt finna betra tímasetningu fyrir það eða ígrunda það lengur og betur nákvæmlega hvað væri eðlilegt framhald í kjölfar þess að skýrslan var lögð fram og rædd. Hvað sem öllu öðru líður þá er þessi ríkisstjórn ekki að fara í viðræður við Evrópusambandið. Það er auðvitað aðalatriði málsins,“ sagði Bjarni í þættinum Sprengisandi.