Eyjólfur Árni Rafnsson hefur verið kjörinn formaður Samtaka atvinnulífsins. Eyjólfur var kjörinn formaður samtakanna á ársfundi Samtaka atvinnulífsins sem haldinn var í dag og tekur við keflinu af Björgólfi Jóhannssyni.
Eyjólfur Árni hefur setið í stjórn Samtaka atvinnulífsins frá 2014 og í framkvæmdastjórn samtakanna síðastliðið ár. Frá árinu 2014 hefur hann átt sæti í stjórn Samtaka iðnaðarins og jafnframt verið varaformaður SI.
Eyjólfur Árni er húsasmiður að mennt og lauk síðar doktorsnámi byggingaverkfræði. Hann hefur undanfarin 20 ár verið í stjórnunarstörfum í íslensku atvinnulífi. Hann var forstjóri Mannvits hf. og forvera þess félags í 12 ár til ársloka 2015. Frá 2016 hefur Eyjólfur Árni sinnt ýmsum ráðgjafa- og stjórnarstörfum.
Eyjólfur Árni er fæddur árið 1957 og er kvæntur Egilínu S. Guðgeirsdóttur og eiga þau fjóra uppkomna syni.
