*

mánudagur, 18. janúar 2021
Innlent 13. nóvember 2020 12:39

Fyrstir til að gefa út sjálfbær skuldabréf

Íslandsbanki hefur, fyrst íslenskra banka, gefið út sjálfbær skuldabréf. Umframeftirspurn rúmlega þreföld.

Ritstjórn
Haraldur Guðjónsson

Íslandsbanki hefur gefið út fyrsta sjálfbæra skuldabréf bankans að fjárhæð 300 milljónir evra til 3 ára. Bréfið ber 0,5 % fasta vexti sem jafngildir 100 punkta álagi yfir millibankavöxtum í evrum. Þetta kemur fram í tilkynningu frá bankanum.

„Útgáfan er jafnframt fyrsta sjálfbæra útgáfa íslensks banka og markar því mikil og ánægjuleg tímamót. Viðtökurnar voru mjög góðar þar sem umframeftirspurn var rúmlega þreföld og seldist útgáfan til yfir 80 evrópskra fjárfesta,“ segir í tilkynningu bankans.

Stefnt er að skráningu bréfanna í kauphöllina á Írlandi þann 20. nóvember 2020 og verður útgáfan gefin út undir Global Medium Term Notes (GMTN) útgáfuramma bankans.

Andvirði útgáfunnar verði notað til lánveitinga sem uppfylla skilyrði sem sett eru fram í sjálfbærum fjármálaramma Íslandsbanka sem gefinn var út nýlega.

Umsjónaraðilar útboðsins voru ABN AMRO, Barclays, Goldman Sachs and UBS Investment Bank.

„Það er afar ánægjulegt að geta nú í fyrsta sinn boðið fjárfestum sjálfbær skuldabréf útgefin af Íslandsbanka.
Skuldabréfaútgáfan er mikilvægur þáttur í vegferð okkar að frekari sjálfbærni og byggir á sjálfbærum fjármálaramma sem bankinn gaf út nýlega. Útgáfan hvetur vonandi fleiri útgefendur til að bæta enn frekar við úrval grænna og sjálfbærra fjárfestingarkosta. Við erum ánægð með þessa miklu eftirspurn sem sýnir mikið traust fjárfesta til Íslandsbanka og íslensks efnahagslífs,‟ er haft eftir Jóni Guðna Ómarssyni, fjármálastjóra Íslandsbanka, í tilkynningunni.