*

mánudagur, 1. mars 2021
Innlent 22. desember 2020 18:04

Gætu farið fram á undanþágu

Almennt við skráningu á markað er áskilið að fjórðungshlutur standi fjárfestum til boða. Ríkið gæti óskað eftir undanþágu vegna Íslandsbanka.

Jóhann Óli Eiðsson
Haraldur Guðjónsson

Mögulegt er að íslenska ríkið muni óska eftir undanþágu frá hefðbundnum þröskuldi almennra fjárfesta við skráningu Íslandsbanka á markað. Slík undanþága yrði þá sett fram í ljósi stærðar hans. Þetta er meðal þess sem kemur fram í greinargerð fjármála- og efnahagsráðherra um ráðgerða sölumeðferð á hlutum í bankanum.

Nýverið samþykkti bankasýsla ríkisins að leggja til að ríkið myndi minnka við sig í Íslandsbanka og stefnt að því að söluferlið fari á fullt strax á fyrri helmingi næsta árs. Stefnt er að því að skrá bankann á markað og nýta skráninguna til að selja hlut ríkisins smám saman. Fyrirhugað sölumagn og áætlað verðbil á hlut ekki ákveðið og mun ekki liggja fyrir fyrr en skráningarlýsing verður birt.

Ekki hefur verið ákveðið hve stór hlutur verður seldur en í greinargerðinni segir að almennt sé miðað við að hlutur almennra fjárfesta, við skráningu á skipulegan markað, verði fjórðungur hið minnsta. Mögulegt sé að ríkið muni sækja um undanþágu frá því skilyrði í ljósi þess hve stór bankinn er. Greinargerðin nú var send Seðlabanka Ísland auk fjárlaganefndar og efnahags- og viðskiptanefndar þingsins. Þegar umsagnir þeirra liggja fyrir, umsagnarfrestur rennur út um miðjan janúar, er stefnt að því að setja söluferlið af stað.

Arðsemi bankans var 4,8% á síðasta ári og lækkaði niður í 2,4% á fyrstu níu mánuðum ársins. Á þriðja ársfjórðungi var hún þó 7,4%.

„Til að fá næga athygli langtímafjárfesta og hámarka endurheimtur er mikilvægt að stjórnendur Íslandsbanka setji fram trúverðuga áætlun um hvernig bankinn muni byggja á batnandi arðsemi, eins og niðurstöður þriðja ársfjórðungs gefa til kynna, þannig að viðunandi söluandvirði fáist fyrir eignarhlut ríkisins í bankanum,“ segir í greinargerðinni. Hana má lesa í heild sinni hér.