*

laugardagur, 19. september 2020
Innlent 27. júlí 2020 07:02

Gerð afturreka öðru sinni

ÚNU hefur öðru sinni fellt úr gildi ákvörðun fjármálaráðuneytisins um afhendingu fundargerða stjórnar Lindarhvols.

Jóhann Óli Eiðsson
Haraldur Guðjónsson

Úrskurðarnefnd um upplýsingamál (ÚNU) hefur öðru sinni gert fjármála- og efnahagsráðuneytið (FJR) afturreka vegna afstöðu þess til afhendingar á fundargerðum stjórnar Lindarhvols ehf. til Viðskiptablaðsins.

Beiðni var send FJR í september í fyrra en aðgangi hafnað þar sem það yrði of tímafrekt fyrir ráðuneytið. ÚNU felldi þá ákvörðun úr gildi í janúar og vísaði málinu aftur til FJR. Ráðuneytið neitaði á ný að afhenda gögnin, nú með vísan til þess að þau væru háð sérstakri þagnarskyldu á grundvelli laga um gjaldeyrismál, laga um Seðlabanka Íslands og laga um fjármálafyrirtæki.

ÚNU féllst ekki á þá túlkun FJR að téð ákvæði hefðu að geyma sérgreindar þagnarskyldureglur sem næðu til starfa stjórnar Lindarhvols. Í úrskurði ÚNU sagði enn fremur að hugsanlegt væri að fundargerðirnar hefðu að geyma upplýsingar um fjárhags- og einkamálefni sem leynt ættu að fara samkvæmt upplýsingalögum. Ekkert mat hefði hins vegar verið lagt á það af hálfu ráðuneytisins heldur synjað um aðgang að fundargerðunum í heild.

Ákvörðun FJR var því felld úr gildi, málinu heimvísað til ráðuneytisins og lagt fyrir það að meta hvaða upplýsingar úr fundargerðunum bæri að afmá og hverjar ekki

Stikkorð: Lindarhvoll