Google reyndi á síðasta ári að kaupa sænsku tónlistarveituna Spotify. Wall Street Journal segir að Google hafi hætt við kaupin, enda hafi stjórnendum Google þótt tónlistarveitan ætlast til að fá alltof hátt verð fyrir fyrirtækið.
The Wall Street Journal hefur eftir ónafngreindum heimildarmanni að eigendur Spotify hafi viljað fá 10 milljarða dala, um 1.150 milljarða króna, fyrir söluna. Hins vegar hafi fyrirtækið aðeins skömmu áður verið metið 4 milljarða dala virði sem Google var talið vera tilbúið til að borga.
Spotify er leiðandi í heiminum í dreifingu tónlistar um netið, notendur þess eru nú um 40 milljónir í 56 löndum. Þar af borga 10 milljónir fyrir þjónustuna.