*

miðvikudagur, 26. janúar 2022
Fólk 25. febrúar 2019 14:56

Guðrún, Erla og Júlía til Sahara

Auglýsingastofan fær þrjá nýja starfsmenn, þær Guðrúnu Andreu Sólveigardóttur, Erlu Arnbjarnardóttur og Júlíu Hvanndal.

Ritstjórn
Guðrún Andrea Sólveigardóttir, Erla Arnbjarnardóttir og Júlía Hvanndal eru nýir starfsmenn Sahara.
Aðsend mynd

Nýlega bættust þrír nýir starfsmenn í 30 manna hóp stafrænu auglýsingastofunnar Sahara, þær Guðrún Andrea Sólveigardóttir, Erla Arnbjarnardóttir og Júlía Hvanndal.

Guðrún Andrea Sólveigardóttir hefur starfað við markaðsmál síðustu 4 ár en síðastliðin 2 ár starfaði hún sem samfélagsmiðlafulltrúi hjá Icelandair hótels. Hún hefur stundað nám í innanhússarkitektúr frá IED í Barcelona, einnig hefur hún lagt stund á nám í arkitektúr í Álaborgarháskóla og er nú að ljúka námi í viðskiptafræði með áherslu á markaðsfræði frá Háskólanum á Akureyri.

Erla Arnbjarnardóttir er sérfræðingur í stafrænni markaðssetningu og hefur starfað að markaðsmálum í rúm 6 ár. Lengst af starfaði hún hjá auglýsingastofunni Pipar\TBWA. Erla er útskrifuð sem viðskiptafræðingur frá Háskóla Íslands.

Júlía Hvanndal er hönnuður og hefur um 10 ára reynslu í mörkun og hönnun fyrir fjölmörg fyrirtæki og stofnanir á Íslandi. Hún starfaði áður sem hönnuður á auglýsingastofunni Brandenburg auk þess að vera í eigin rekstri. Júlía er með BA gráðu í grafískri hönnun frá Listaháskóla Íslands.

Vinna að jafnara kynjahlutfalli

Davíð Lúther, framkvæmdastjóri Sahara segist virkilega ánægður með nýlegar ráðningar félagsins. „Sahara hefur stækkað gríðarlega hratt og má búast við frekari stækkun á næstu mánuðum, enda eru fjölmörg fyrirtæki, stofnanir og sveitarfélög farin að nýta stafræna miðla í auglýsingamálum,“ segir Davíð.

„Samhliða miklum vexti hjá fyrirtækinu höfum við markvisst verið að vinna að því að jafna kynjahlutfallið og auka breidd í menntun og reynslu meðal starfsfólks. Við lítum svo á að jafnvægi á okkar vinnustað, í breiðum skilningi þess orðs, skili sér í betri vinnu og ánægju starfsfólks sem viðskiptavinir okkar njóta góðs af.“

Um Sahara:

Sahara er stafræn auglýsingastofa sem býður upp á heildstæða lausn á sviði stafrænnar markaðssetningar fyrir fyrirtæki og stofnanir að því er segir í fréttatilkynningu. Sérhæfir fyrirtækið sig í umsjón með samfélagsmiðlum og stafrænum herferðum, myndbanda- og auglýsingagerð, grafískri hönnun og ljósmyndun, árangurmælingum og öðrum stafrænum lausnum.