*

sunnudagur, 19. september 2021
Fólk 11. febrúar 2021 16:35

Guðrún Ragna nýr formaður FA

Guðrún Ragna Garðarsdóttir, framkvæmdastjóri Atlantsolíu, tekur við af Magnúsi Óla Ólafssyni sem formaður Félags atvinnurekenda.

Ritstjórn
Guðrún Ragna Garðarsdóttir.
Gígja Einars

Guðrún Ragna Garðarsdóttir, framkvæmdastjóri Atlantsolíu, er nýr formaður Félags atvinnurekenda. Hún var kjörin á aðalfundi félagsins í dag og tekur við af Magnúsi Óla Ólafssyni forstjóra Innness, sem hafði verið formaður síðustu fjögur ár.

Guðrún hefur setið í stjórn Félags atvinnurekenda undanfarin tvö ár, verið framkvæmdastjóri Atlantsolíu frá árinu 2008. Áður var hún aðstoðarfjármálastjóri fyrirtækisins. Guðrún starfaði þar á undan sem fjármálastjóri Heildverslunar Ásgeirs Sigurðssonar. Guðrún Ragna er með mastersgráðu í fjármálum frá EADA í Barcelona á Spáni, MBA frá Háskóla Íslands og er viðskiptafræðingur frá HÍ. Hún er gift og á þrjú börn.

„Ég þakka félagsmönnum traustið og hlakka til að taka enn virkari þátt í starfi Félags atvinnurekenda. FA vill veita aðildarfyrirtækjunum góða þjónustu og berst mikilvægri baráttu fyrir virkri samkeppni og hagstæðu rekstrarumhverfi fyrirtækja. Félagið gegnir líka mikilvægu hlutverki við að halda á lofti málstað minni og meðalstórra fyrirtækja, " er haft eftir Guðrúnu Rögnu í tilkynningu frá FA.

Tveir nýir stjórnarmenn voru kjörnir á aðalfundinum. Leifur Örn Leifsson, framkvæmdastjóri fyrirtækjasviðs Innness, var kjörinn meðstjórnandi til eins árs. Lilja Dögg Stefánsdóttir, framkvæmdastjóri LYFIS/apótekasviðs Icepharma, var kjörin meðstjórnandi til tveggja ára.

Auk nýju stjórnarmannanna var Friðrik Ingi Friðriksson, eigandi og forstjóri í Aflvélum, Burstagerðinni og Spodriba, endurkjörinn meðstjórnandi til tveggja ára. Áfram sitja í stjórn, kjörin til tveggja ára á aðalfundi 2020, þau Anna Kristín Kristjánsdóttir, stjórnarmaður og eigandi í Hvíta húsinu, og Guðmundur R. Sigtryggsson, framkvæmdastjóri XCO.