*

mánudagur, 6. desember 2021
Innlent 24. janúar 2019 12:09

Gylfi hefur þénað fjóra milljarða

Úttekt Viðskiptablaðsins á tekjum íslenskra atvinnumanna knattspyrnu undanfarin ár.

Ingvar Haraldsson
Gylfi Sigurðsson er langlaunahæsti íslenski atvinnumaðurinn síðastliðinn áratug.
EPA

Gylfi Þór Sigurðsson er launahæsti íslenski atvinnumaðurinn í knattspyrnu og hefur þénað um fjóra milljarða króna fyrir skatta á sínum atvinnumannaferli í knattspyrnu samkvæmt samantekt Viðskiptablaðsins. Viðskiptablaðið hefur undanfarinn áratug birt upplýsingar um tekjur íslenskra atvinnumanna í ritinu Áramótum. Alls hafa íslenskir atvinnumenn fengið vel á annan tug milljarða greidda í laun undanfarinn áratug.

Gylfi Þór hækkaði þónokkuð í launum þegar hann gekk til liðs við Everton árið 2017 en hann á þrjú og hálft ár eftir af samningi sínum við liðið. Gylfi er langsamlega launahæsti íslenski atvinnumaðurinn og stefnir í að laun hans verði ekki langt frá launum Eiðs Smára Guðjohnsen þegar ferlinum lýkur. Gylfi jafnaði um helgina markafjölda Eiðs Smára í ensku úrvalsdeildinni með sínu 55. marki og er Gylfi meðal fimmtán markahæstu miðjumannanna í sögu ensku úrvalsdeildarinnar.

Aðrir lykilmenn í íslenska landsliðinu eru nokkuð á eftir Gylfa en tekjur þeirra frá 2009-2018 nema um milljarði króna fyrir skatta. Í þeim flokki eru Aron Einar Gunnarsson landsliðsfyrirliði og Jóhann Berg Guðmundsson sem báðir leika í ensku úrvalsdeildinni, ásamt Kolbeini Sigþórssyni, leikmanni Nantes, og Alfreð Finnbogasyni leikmanni Augsburg. Kolbeinn Sigþórsson hefur glímt við alvarleg meiðsli undanfarin ár og hefur því nær ekkert leikið frá því að EM í Frakklandi lauk árið 2016. Hann hefur hins vegar ekki viljað fara í önnur lið, sem að líkindum myndu bjóða honum lægri laun en hann á 18 mánuði eftir af samningi sínum við Nantes.

Samkvæmt upplýsingum sem komu fram í Áramótum Viðskiptablaðsins og Frjálsrar verslunar námu laun Kolbeins um 130 milljónum króna í fyrra. Alfreð hefur tekið við hlutverki Kolbeins sem aðalframherji landsliðsins og átt góðu gengi að fagna með félagsliði sínu Augsburg í þýsku úrvalsdeildinni. Laun Alfreðs hafa því hækkað nokkuð á síðustu árum og námu um 200 milljónum króna í fyrra. 

Nánar má lesa um málið í Viðskiptablaðinu sem út kom í morgun, fimmtudaginn 24. janúar 2019. Áskrifendur geta nálgast blaðið undir Tölublöð, aðrir geta gerst áskrifendur hér.