Ársverðbólga hækkaði nokkuð óvænt í marsmánuði er vísitala neysluverðs hækkaði um 0,8% milli mánaða. Ársverðbólga mældist 6,8% í mánuðinum en það sem kom greiningaraðilum mest á óvart var töluverð hækkun á reiknaðri húsaleigu.
Reiknaða húsaleigan hækkaði um 2,1% og hafði 0,4% áhrif á VNV. Greiningardeild Íslandsbanka spáði um 0,8% hækkun á húsaleigu og 0,15% áhrifum á VNV.
„Þróun húsnæðismarkaðar næstu mánuði kemur til með að litast af uppkaupum ríkisins á eignum í Grindavík en húsnæðisverð á Suðurnesjum hefur hækkað meira en annars staðar síðustu vikur,” segir í greiningu bankans.
„Endurspeglast það í því að íbúðaverð utan höfuðborgarsvæðisins hækkaði um 3,8% milli mánaða samkvæmt Hagstofunni en á sama tíma hækkaði verð á sérbýlum á höfuðborgarsvæðinu um 1,2% og verð á íbúðum í fjölbýli einungis um 0,6% á sama mælikvarða,” segir þar enn fremur.
Hagstofa Íslands mun frá og með júní næstkomandi nota aðferð húsaleiguígilda í stað aðferð einfalds notendakostnaðar við útreikning á reiknaðri húsaleigu í vísitölu neysluverðs.
Hagstofan tilkynnti í lok janúar að til stæði að innleiða nýja aðferð við mat á reiknaðri leigu í vísitölu neysluverðs.
Hagstofan telur að með ítarlegri gögnum um leigumarkaðinn sé nú hægt að byggja líkan fyrir reiknaða húsaleigu á þann hátt að það nái til alls íbúðarhúsnæðis sem er í eigin notkun.
„Með slíku líkani má meta verðbreytingu á reiknaðri húsaleigu þannig að samræmi sé tryggt milli verðþróunar á leigumarkaði og notkunar eigin húsnæðis, óháð skammtímasveiflum á fjármálamarkaði.“