Stjórn samfélagsmiðilsins Truth Social, sem samanstendur m.a. af Donald Trump Jr. og þremur ráðherrum úr ríkisstjórn Trump, mun ákveða hversu mikið af hlutabréfum í félaginu Donald Trump fyrrverandi forseti Bandaríkjanna má selja á næstu vikum.
Á föstudaginn síðastliðinn ákvað stjórn félagsins að sameinast sérhæfða yfirtökufélaginu (e. SPAC) Digital World Acquisition Corp. en gengi DWA stendur í um 50 dölum um þessar mundir.
Miðað við það er markaðsvirði Truth Social 6,8 milljarðar Bandaríkjadala og er 60% hlutur Trump metinn á 4 milljarða dali, sem samsvarar um 550 milljörðum króna á gengi dagsins.
Áfrýjunardómstóll í New York lækkaði í gær trygginguna sem Trump þarf að greiða vegna sektar í fjársvikamáli úr 454 milljónum dala í 175 milljónir dala.
Trump þyrfti því ekki að selja nema brotabrot af hlutum sínum í Truth Social til að eiga fyrir tryggingunni en það er ómögulegt að spá fyrir um hvað söluþrýstingur myndi gera fyrir gengið enda markaðsvirði félagsins í engu samræmi við undirliggjandi virði.
Um 400% hækkun frá skráningu
Digitial World Acquisition Corp er líkt og önnur sérhæfð yfirtökufélög bara skel með enga starfsemi. Útboðsgengið í slíkum félögum er ávallt 10 dalir en gengið getur sveiflast verulega á meðan leitað er eftir félagi til að sameinast.
Eftir að DWA ákvað að sameinast Truth Social hafa stuðningsmenn Trumps verið að kaupa bréf til þrýsta genginu upp. Gengi félagsins hefur nú hækkað um 400% frá því það fór á markað í október 2021.
Gengi félagsins hefur hækkað um 13% í viðskiptum dagsins.
Auðkennið DJT á Nasdaq
Fyrsti viðskiptadagur með hlutabréf hins sameinaða félags er í dag og verður auðkennið DJT sem eru upphafsstafir forsetans fyrrverandi.
Samkvæmt WSJ hefur Truth Social tapað tugum milljónum dala frá því að samfélagsmiðillinn hóf göngu sína.
Heildartekjur félagsins frá stofnun eru um 5 milljónir dala og því má segja að 6,8 milljarða dala markaðsvirði félagsins sé í engu samræmi við raunvirði félagsins.
Af þeim sökum gæti það reynst Trump erfitt að fá lán gegn veði í bréfinu þar sem ábyrgðaraðili lánsins myndi þurfa að taka á sig verulega áhættu þar sem það er með öllu óvíst hvert gengi félagsins stefnir.
Samkvæmt venju ætti honum að vera meinað að selja bréf næstu sex mánuðina en stjórn Truth Social gæti veitt honum undanþágu sem líkt og fyrr segir er samsett af fjölskyldu og vinum.