Lagadeild Háskólans í Reykjavík og Fjármálaeftirlitið skrifuðu í dag undir starfsnámssamning fyrir nemendur lagadeildar. Þetta er 16. samningur lagadeildar við stofnanir og fyrirtæki um starfsnám fyrir nemendur sem þeir fá metið til eininga.
Þetta kemur fram í tilkynningu frá HR.
Hluti af meistaranámi við lagadeild Háskólans í Reykjavík getur farið fram í viðurkenndu starfsnámi og getur nemandi fengið allt að 6 einingar metnar í meistaranámi á grundvelli starfsnámssamninga lagadeildarinnar og einstakra stofnana og fyrirtækja.
Það skilyrði er sett í reglum um starfsnám að nemandi vinni undir eftirliti umsjónaraðila að lögfræðilegu verkefni eða verkefnum sem séu sannarlega til þess fallin að auka þekkingu hans í lögfræði og hæfni til að vinna að úrlausn lögfræðilegra verkefna.
Lagadeild HR hefur þar með gert starfsnámssamninga við eftirtaldar stofnanir og fyrirtæki:
- Dómsmálaráðuneytið
- Einkaleyfastofuna
- Glitni hf.
- Héraðsdóm Reykjaness
- Héraðsdóm Reykjavíkur
- Landsbanka Íslands hf.
- Lex-Nestor lögmannsstofu
- LOGOS lögmannsþjónustu
- Póst- og fjarskiptastofnun
- Sjóvá - Almennar Tryggingar hf.
- Straum - Burðarás fjárfestingarbanki hf.
- Utanríkisráðuneytið
- Samkeppniseftirlitið
- Umhverfisráðuneytið
- Icebank
- Fjármálaeftirlitið
