Íslensk erfðagreining greindi frá því í dag að hafnar séu klínískar lyfjaprófanir af fyrsta fasa á DG041, nýju lyfi sem fyrirtækið hefur þróað gegn æðakölkun í útlimum, eða svokölluðum útæðasjúkdómi. Mikill skortur er á lyfjameðferð gegn þessum algenga og alvarlega æðasjúkdómi sem hrjáir yfir 20% fólks yfir sjötugu á Vesturlöndum. Fyrsti fasi klínískra lyfjaprófana beinist að því að kanna öryggi lyfsins, lyfjahvörf og lyfjahrif í heilbrigðum einstaklingum segir í tilkynningu félagsins.

"Þetta er annað lyfið sem við höfum hafið klínískar lyfjaprófanir á og fyrsta lyfið sem við höfum þróað frá grunni hjá Íslenskri erfðagreiningu. Það er mjög ánægjulegt að sjá að erfðarannsóknir okkar eru að bera ávöxt í þróun nýrra lyfja gegn nokkrum af stærstu heilbrigðisvandamálum heimsins," sagði Kári Stefánsson, forstjóri Íslenskrar erfðagreiningar.

"Erfðarannsóknirnar hafa veitt okkur einstæða innsýn í líffræðilegar orsakir sjúkdóma og forskot við þróun nýrra lyfja. Meingenin sem við höfum einangrað hafa flest reynst geyma upplýsingar um góð lyfjamörk sem hægt er að hafa áhrif á með tiltölulega einföldum lyfjasameindum. Niðurstöður erfðarannsóknanna hafa því gert okkur kleift að hanna lyf sem hafa áhrif á líffræðilega ferla sem við vitum að tengjast raunverulegum orsökum sjúkdóma og ættu því að vera mjög virk og mjög sértæk. Þær niðurstöður sem þegar liggja fyrir um virkni DG041 úr forklínískum rannsóknum hafa lofað góðu og ég hlakka til að deila með ykkur niðurstöðunum úr þessum fyrsta fasa klínísku rannsóknanna eftir nokkra mánuði."

Erfðarannsóknir Íslenskrar erfðagreiningar á útæðasjúkdómi sýndu að algengur breytileiki í PTGER3 erfðavísinum, sem hefur að geyma upplýsingar um byggingu EP3-viðtakans, tengist töluvert auknum líkum á æðakölkun í útlimum. DG041 er nýr, sértækur og mjög virkur hindri á starfsemi EP3-viðtakans sem vísindamenn Íslenskrar erfðagreiningar hafa þróað. Í forklínískum rannsóknum hefur verið sýnt fram á að lyfið hindrar samloðun blóðflagna af völdum prostaglandíns E2 í tilraunaglösum og að þessi áhrif eru háð skammtastærð lyfsins.

Um æðakölkun í fótum (útæðasjúkdóm)

Útæðasjúkdómur hrjáir um 10% fullorðinna í vestrænum löndum og yfir 20% þeirra sem komnir eru yfir sjötugt. Sjúkdómurinn lýsir sér í því að útæðar þrengjast vegna fituhrörnunar/kölkunar og blóðstreymi hindrast til handa og fóta. Helti vegna tímabundins sársauka í mjöðmum, kálfum og þjóhnöppum við göngu eða æfingar eru helstu einkenni sjúkdómsins. Takmarkað blóðflæði til vöðva getur valdið sársauka sem hverfur um leið og hreyfingu lýkur. Ef æð stíflast getur það leitt til dreps í útlimum. Engin lyfjameðferð er þekkt sem hefur áhrif á líffræðilegar orsakir sjúkdómsins eða kemur í veg fyrir framþróun hans.

Byggt á tilkynningu frá Íslenskri erfaðagreiningu.