Ingi Fjalar Magnússon hefur tekið við starfi þróunarstjóra hjá Applicon. Meðal helstu verkefna hans er umsjón með þróunarverkefnum Applicon og að stýra nýstofnaðri verkefnastofu fyrirtækisins.
Þetta kemur fram í tilkynningu frá Applicon en Applicon er í eigu samstæðu Nýherja.
Í tilkynningunni kemur fram að markmiðið með stofnun verkefnastofu er að auka gæðaeftirlit enn frekar og skerpa á núverandi verkstjórnunarferli.
„Með þessum hætti hyggst fyrirtækið stuðla að enn betri þjónustu fyrir viðskiptavini,“ segir í tilkynningunni.
Ingi starfaði áður hjá Nordea banka í Ósló í Noregi. Hann lauk tölvunarfræði frá Háskóla Íslands og tók MBA gráðu frá Norwegian School of Management. Þá lauk hann PMP (Project Management Professional) gráðu í verkefnastjórnun frá PMI stofnuninni.
Ingi er kvæntur Sólveigu Margréti Ólafsdóttur og eiga þau þrjú börn.
