*

sunnudagur, 18. apríl 2021
Innlent 8. desember 2020 15:00

Kári tekur við verðlaunum forsetans

Íslensk erfðagreining hlýtur Útflutningsverðlaun forseta Íslands 2020 og Hildur Guðnadóttir hlýtur heiðursviðurkenningu.

Ritstjórn
Kári Stefánsson, forstjóri Íslenskrar erfðagreiningar, tók við útflutningsverðlaunum forseta Íslands í Hörpu í dag.
Aðsend mynd

Íslensk erfðagreining hlaut í dag Útflutningsverðlaun forseta Íslands 2020. Kári Stefánsson, forstjóri fyrirtækisins veitti verðlaununum viðtöku við lokaða athöfn í Hörpu. Við sama tilefni var Hildi Guðnadóttur, tónskáldi og tónlistarmanni, veitt heiðursviðurkenning fyrir störf sín á erlendri grund.

Í tilkynningu um úthlutun verðlaunanna til Íslenskrar erfðagreiningar segir að á síðustu árum hafi ný hugvitsgrein sprottið úr öflugu íslensku vísindasamfélagi og traustu heilbrigðiskerfi; líf- og heilsutækni í víðtækum skilningi.

Fyrir utan efnahagslegt mikilvægi þessarar starfsemi fyrir þjóðarbúið og þau spennandi tækifæri sem hún skapar fyrir ungt og menntað fólk, hefur bein þýðing lífvísindanna fyrir líf og heill almennings komið berlega í ljós í yfirstandandi heimsfaraldri.

Eitt fyrsta erlenda fjárfestingin í þekkingu og hugviti utan orkuiðnaðarins

Ein þýðingarmestu tímamót í þróun þessarar mikilvægu atvinnugreinar á Íslandi er sögð án efa vera stofnun Íslenskrar erfðagreiningar. Hér var komið eitt af fyrstu stóru fjárfestingaverkefnunum hér á landi með aðkomu erlendra aðila, sem ekki byggði á orkuauðlindum okkar heldur þekkingu og hugviti.

Áhrifin af tilkomu  fyrirtækisins náðu langt út fyrir eiginlega starfsemi þess enda var grunnur lagður að nýrri tegund alþjóðlegrar þekkingarstarfsemi hér á landi. Til varð stærri og frjórri vettvangur vísindastarfs í atvinnulífinu sem laðaði bæði innlenda og erlenda sérfræðinga til landsins. Ófá íslensk fyrirtæki á þessu sviði má beinlínis rekja til þess jarðvegs sem hér varð til.

Í nýrri framtíðarstefnu fyrir íslenskan útflutning er litið sérstaklega til lífvísindanna sem mögulegrar uppsprettu aukinna útflutningstekna á komandi árum. Því skiptir orðspor greinarinnar utan landsteinanna miklu máli.

Framlag fyrirtækisins til leitarinnar að orsökum margra alvarlegustu sjúkdóma mannkyns, svo sem krabbameina, hjartasjúkdóma og sykursýki, er jafnframt sagt afar mikilvægt. Undanfarin ár hefur útflutningsvara Íslenskrar erfðagreiningar verið þekking og aukinn skilningur á orsökum þessara sjúkdóma.

Jafnframt er bent á afar þýðingarmikið hlutverk Íslenskrar erfðagreiningar í yfirstandandi heimsfaraldri þar sem framlag fyrirtækisins í baráttunni við að ná tökum á faraldrinum og halda þar með efnahagslega og þjóðhagslega mikilvægri starfsemi gangandi, hafi vegið afar þungt.

Umfjöllun fjölda virtra alþjóðlegra fjölmiðla dró upp mynd af landi með þróaða innviði, vísindastarf og líftæknifyrirtæki á heimsvísu. Sú umræða er styrkur fyrir allar útflutningsgreinar, ekki síst ferðaþjónustuna.

Heiðursviðurkenning vegna sköpunnarstarfa

Samhliða afhendingu Útflutningsverðlaunanna var Hildi Guðnadóttur, tónskáldi og tónlistarmanni, veitt sérstök heiðursviðurkenning fyrir eftirtektarverð störf á erlendri grundu. Með sköpun sinni hefur orðspor Hildar borist út um allan heim á undanförnum árum og hún hlotið verðskuldaðar viðurkenningar. Hildur vann á þessu ári Óskarsverðlaunin, fyrst Íslendinga.

Hún hafði áður m.a. hlotið Emmy verðlaun, Grammy verðlaun, Golden Globe og BAFTA verðlaunin. Þá er hún tilnefnd til tvennra Grammy verðlauna sem verða afhent í janúar nk. Systir Hildar, Margrét Guðnadóttir, veitti verðlaununum viðtöku fyrir hennar hönd.

Verðlaunin afhent á hverju ári frá 1989

Tilgangurinn með veitingu Útflutningverðlaunanna er að vekja athygli á þjóðhagslegu mikilvægi gjaldeyrisöflunar og alþjóðlegra viðskipta og heiðra þá sem hafa náð sérstaklega góðum árangri í sölu og markaðssetningu á íslenskum vörum og þjónustu erlendis.

Veiting verðlaunanna tekur mið af verðmætisaukningu útflutnings, hlutdeild útflutnings í heildarsölu, markaðssetningu á nýjum mörkuðum og fleiru.  Útflutningsverðlaunin eru nú veitt í 32. sinn en þau voru fyrst afhent árið 1989.

Meðal annarra fyrirtækja er hlotið hafa verðlaunin í gegnum tíðina eru Sjóklæðagerðin – 66°Norður, Trefjar ehf, Nox Medical, Truenorth og Ferðaskrifstofa bænda, og á síðasta ári hlaut Marel verðlaunin.

Í úthlutunarnefndinni sátu að þessu sinni:

  • Örnólfur Thorsson, frá embætti forseta Íslands
  • Gylfi Magnússon, frá viðskipta- og hagfræðideild Háskóla Íslands
  • Katrín Olga Jóhannesdóttir frá Viðskiptaráði
  • Þórunn Sveinbjörnsdóttir, frá Alþýðusambandi Íslands
  • Hildur Árnadóttir frá Íslandsstofu, en Íslandsstofa ber ábyrgð á undirbúningi og framkvæmd við verðlaunaveitinguna.