VR og Félag atvinnurekenda (FA) skrifuðu undir nýjan kjarasamning í morgun, föstudaginn 13. maí. Í frétt á heimasíðu VR kemur fram að samningurinn er sambærilegur við nýgerðan kjarasamning VR og SA og gerir ráð fyrir sambærilegum hækkunum launa á sama tíma.
Lágmarkstaxti verður þó 202 þúsund frá 1. júní næstkomandi. Þessi samningur tekur til innan við 10% félagsmanna VR, langflestir vinna samkvæmt samningi við Samtök atvinnulífsins.
Eingreiðsla 1. júní mun nema 50.000 krónum fyrir starfsmann í fullu starfi sem er við störf í maí og miðast greiðslan við fullt starf í mánuðunum mars - maí. Starfsmenn í hlutastarfi fá hlutfallslegar greiðslur m.v. starfshutfall hvers og eins. Álag á orlofsuppbót 2011 er tíu þúsund krónur. Álag á desemberuppbót í ár er fimmtán þúsund krónur.
Samningurinn verður borinn undir atkvæði félagsmanna eins fljótt og auðið er.
Helstu atriði samningsins
Launabreytingar þeirra sem ekki fá greitt skv. lágmarkstaxta:
1. júní 2011 4,25%
1. febrúar 2012 3,50%
1. febrúar 2013 3,25%
Lágmarkstaxtar hækka sem hér segir:
1. júní 2011 kr. 12.000
1. febrúar 2012 kr. 11.000
1. febrúar 2013 kr. 11.000
Lágmarkstaxti fyrir fullt starf verður:
1. júní 2011 kr. 202.000
1. febrúar 2012 kr. 213.000
1. febrúar 2013 kr. 224.000
