Landsvirkjun undirritaði í dag samning um útgáfu skuldabréfs að fjárhæð 100 milljónir Bandaríkjadollara. Skuldabréfið er til fimm ára og ber fasta 6,5% vexti.
Þetta kemur fram í tilkynningu frá Landsvirkjun en útgáfan markar tímamót hjá Landsvirkjun en hún er fyrsta skuldabréfaútgáfa fyrirtækisins sem seld er til erlendra fjárfesta eftir bankahrunið 2008.
Milligönguaðili er Deutsche Bank og eru kaupendur erlendir fjárfestar.
„Þessi skuldabréfaútgáfa er mjög jákvæð fyrir Landsvirkjun en með henni tryggir fyrirtækið enn frekar lausafjárstöðu sína,“ segir Hörður Arnarson, forstjóri Landsvirkjunar í tilkynningunni.
„Kjör skuldabréfsins eru einnig, í ljósi erfiðra markaðsaðstæðna, vel ásættanleg fyrir fyrirtækið. Útgáfan endurspeglar jafnframt mikið traust erlendra aðila á fyrirtækinu og gefur fyrirheit um að aðgengi að erlendu fjármagni sé að rýmkast“.
Fram kemur í tilkynningunni að fyrirtækið hefur nú aðgang að um 450 milljónum Bandaríkjadollara til að mæta skuldbindingum næstu ára. Landsvirkjun hefur með þessu móti leyst verulegan hluta af endurfjármögnunarþörf fyrirtækisins fyrir árin 2012 og 2013.
„Að gefnu tilefni vill Landsvirkjun taka fram að þessi útgáfa skuldabréfa tengist ekki fyrirhuguðum framkvæmdum við Búðarhálsvirkjun. Landsvirkjun hefur samhliða þessari útgáfu unnið að fjármögnun þess verkefnis og er gert ráð fyrir að þau mál skýrist á næstu vikum,“ segir loks í tilkynningunni.
