Yfirtökutilboð Lur Berri Iceland ehf. til hluthafa Alfesca var samþykkt af eigendum 1.354.276.604 hluta í Alfesca sem samsvarar 23,04% af útgefnu hlutafé félagsins.
Lur Berri Iceland ehf. hefur því tryggt sér 1.525.648.561 hluti í Alfesca, eða sem samsvarar 25,96% af útgefnu hlutafé Alfesca þar sem það átti við upphaf tilboðsins 171.371.927 hluti eða 2,92% af útgefnu hlutafé félagsins.
Þetta kemur fram í tilkynningu til Kauphallarinnar.
Í tilkynningunni kemur fram að fyrir tilboðið áttu samstarfsaðilar, sem samanstanda af Lur Berri Holding SAS (móðurfélag Lur Berri Iceland), Kjalar Invest B.V., Alta Food Holding B.V., Kaupthing Singer & Friedlander Ltd. og tilteknir stjórnendur Alfesca, samanlagt 68,30% af útgefnu hlutafé Alfesca
„Í kjölfar tilboðsins hafa samstarfsaðilarnir tryggt sér 91,34% af útgefnu hlutafé Alfesca og munu fara með samsvarandi atkvæðisrétt þegar uppgjör á yfirtökutilboðinu hefur farið fram,“ segir í tilkynningunni.
Þá kemur fram að hluthafar sem samþykkt hafa tilboðið munu fá kaupverð hlutanna greitt eigi síðar en 24. ágúst 2009 í samræmi við skilmála tilboðsins, samhliða því að Lur Berri Iceland ehf. fær hlutina framselda.
Í tilkynningunni kemur jafnframt fram að í ljósi þess að samstarfsaðilarnir eiga sameiginlega meira en 90% útgefins hlutafjár og fara með meira en 90% atkvæðisréttar í Alfesca hyggst Lur Berri Iceland ehf. nú leggja til við stjórn félagsins að hlutir í eigu annarra hluthafa Alfesca verði innleystir með heimild í lögum um verðbréfaviðskipti.
Ennfremur, líkt og kveðið er á um í tilboðsyfirlitinu sem dagsett er 25. júní 2009, munu samstarfsaðilarnir nú gera viðeigandi ráðstafanir svo hlutafé Alfesca verði tekið úr viðskiptum í Kauphöllinni.
