Seðlabanki Brasilíu tilkynnti í gær um mestu stýrivaxtahækkun frá árinu 2002 en bankinn á nú við tveggja stafa verðbólgu að etja. Seðlabankinn hækkaði vexti um 1,5 prósentur og eru stýrivextir í Brasilíu nú komnir upp í 7,75%. Financial Times greinir frá.
Stýrivextir höfðu þegar verið hækkaðir um 100 punkta við síðustu tvær stýrivaxtaákvarðanir brasilíska seðlabankans sem hefur nú hækkað vexti sex sinnum í ár. Hann varaði jafnframt við sambærilegri vaxtabreytingu við næsta fund peningastefnunefndar.
Brasilía, fjölmennasta land Suður-Ameríku, hefur horft upp á verulegar verðhækkanir að undanförnu, meðal annars vegna hækkandi eldsneytiskostnaðar, lægra gengi brasilíska gjaldmiðilsins Real, ásamt því að þurrkar hafa ýtt undir orkuverð. Verðbólgan í Brasilíu mældist 10,3% í byrjun október.
Þá er forsetinn Jair Bolsonaro farinn að búa sig undir kosningar eftir rúmt ár en kosningaloforð hans, sem felast m.a. í auknum greiðslum úr velferðarkerfinu til hinna fátækustu, hafa valdið áhyggjum meðal fjárfesta um hækkandi verðbólgu.
#Brazil - BCB raises policy rate by above-expected 150bps to 7.75%
— EmergingMarketWatch (@EmergingMWatch) October 27, 2021
This is a sixth consecutive increase, bringing the scale of tightening so far to 575bps https://t.co/8qMedAe7HM #EmergingMarkets pic.twitter.com/XOvPKgHjXA