Gengisvísitala íslensku krónunnar hefur lækkað talsvert, eða 10,6%, á síðasta ári og hefur krónan ekki styrkst eins mikið milli ára í marga áratugi. Greiningardeild Landsbankans gerir styrkingu krónunnar að umfjöllunarefni sínu í Hagsjá bankans .
Vísitalan mælir breytingar á gengi krónunnar miðað við vægi einstakra gjaldmiðla í inn- og útflutningi landsins og gefur því góða heildarmynd af þróun krónunnar gagnvart erlendum miðlum.
„Seðlabankinn hóf að reikna og birta gengisvísitölur árið 1991. Áður hafði krónan styrkst hlutfallslega mest milli áranna 2004 og 2005 en þá lækkaði gengisvísitalan um 10,1% milli ársmeðaltala. Sé litið til áranna fyrir tíma gengisvísitalna þarf að fara allt aftur til kreppunnar miklu á fjórða áratug síðustu aldar til að finna meiri styrkingu krónunnar gagnvart erlendum gjaldmiðlum. Á þessum tíma er þó einungis til skráð gengi krónu gagnvart Bandaríkjadollar,“ segir í Hagsjánni.
Einnig er tekið fram að árin 1933 og 1934 lækkaði gengi dollarans um 16,7% að meðaltali gagnvart krónu. Sú veiking dollarans á rætur að rekja til kreppunnar miklu sem hófst árið 1929.
Krónan hefur styrkst fjögur ár í röð milli ára. Það hefur einungis gerst þrisvar sinnum. Fyrsta tímabilið var frá 1997 til 2000. Annað tímabilið var á milli 2002 og 2005. Af þessum þremur umræddu tímabilum er tímabilið nú það tímabil sem krónan styrktist hlutfallslega mest. „Þannig lækkaði gengisvísitalan á nýliðnu tímabili um samtals 19% á þessum fjórum árum. Í kringum miðjan áratug lækkaði gengisvísitalan um 16,9% og um 4% á tímabilinu eftir miðjan tíunda áratug síðustu aldar,“ er einnig tekið fram.
