*

þriðjudagur, 28. september 2021
Erlent 13. júlí 2021 07:10

Musk „hatar“ að reka Tesla

Forstjóri rafbílaframleiðandans segist mun fremur vilja eyða tíma sínum í hönnun og þróun en rekstur fyrirtækisins.

Ritstjórn
Elon Musk nýtur þess ekki að sinna forstjórastarfinu að eigin sögn. Hönnun og vöruþróun séu hans ær og kýr.
epa

Elon Musk, forstjóri Tesla og einn ríkasti maður heims, segist ekki njóta forstjórastarfsins, heldur „eiginlega hata það“. Ummælin lét hann falla í dómssal í gær vegna máls í tengslum við kaup rafbílaframleiðandans á sólarsellufyrirtækinu SolarCity. Wall Street Journal segir frá.

Musk hefur verið sakaður um að hafa látið Tesla vísvitandi ofgreiða fyrir SolarCity árið 2016, en hann var þá stjórnarformaður beggja félaga. Ákærendur í málinu – þáverandi hluthafar í Tesla – segja 2,1 milljarða dala kaupin hafa verið til þess gerð að bjarga sólarsellufyrirtæki hans, sem hafi rambað á barmi gjaldþrots.

Í vitnisburði Musk fyrir dómnum sagðist hann ekki telja félagið hafa verið í fjárhagsvanda. Samþætting rafhlöðu- og sólarsellutækni hafi verið lykilþáttur í vöruframboði Tesla, og hluti af sýn hans fyrir rafbílafyrirtækið frá upphafi. „Við gátum einfaldlega ekki boðið slíka vöru á meðan þetta voru tvö aðskilin fyrirtæki.“

Sem fyrr segir sagðist Musk ennfremur sinna forstjórastarfinu af illri nauðsyn. „Ég vil mun frekar eyða tíma mínum í hönnunar- og þróunarvinnu, sem er það sem ég nýt þess að gera að eðlisfari.“

Stikkorð: Tesla Elon Musk SolarCity