Umhverfisstofnun hefur gefið út starfsleyfi fyrir Norðurskel ehf. til að rækta krækling og til lirfusöfnunar í Eyjafirði.
Þetta kemur fram á vef Umhverfisstofnunar en starfsleyfið nær til fjögurra skilgreindra svæða í Eyjafirðinum sem nánar koma fram í meðfylgjandi kortum í viðaukum starfsleyfisins ásamt hnitum svæðanna.
Staðirnir eru við sunnanverða Hrísey, í Reitsvík og við Rauðuvík. Á fjórða svæðinu, frá Dagverðareyri og að Brávöllum fer fram lirfusöfnun.
Fram kemur á vef Umhverfisstofnunar að stofnunin auglýsti tillögu að starfsleyfi fyrir Norðurskel ehf. á tímabilinu 27. nóvember 2009 til 22. janúar 2010.
Þrjár athugasemdir bárust. Á meðal athugasemdanna var ábending frá Heilbrigðiseftirliti Norðurlands eystra um að svæðið við Rauðuvík væri nærri svokölluðum Arnarnesstrýtum, en þær eru friðað náttúruvætti samkvæmt auglýsingu umhverfisráðuneytisins.
Við nánari athugun kom í ljós að svæðið sem auglýst var, náði inn fyrir friðlýsta svæðið og var því svæðið minnkað í starfsleyfinu og rekstraraðila gert að færa bauju sem afmarkar ræktunarsvæðið.
Starfsleyfið öðlast þegar gildi og gildir til 1. maí 2022.
