Orðin fáviti og daufblindur verða tekin út úr íslenskum lögum samkvæmt frumvarpi sem innanríkisráðherra hyggst leggja fram á Alþingi. Frumvarpið fjallar um breytta hugtakanotkun í íslenskri löggjöf og er hluti af undirbúningi á fullgildingu samnings Sameinuðu þjóðanna um réttindi fatlaðs fólks hér á landi. Innanríkisráðuneytið hefur birt drögin á heimasíðu sinni .
Orðið fáviti kemur fyrir í almennum hegningalögum frá árinu 1940. Orðinu verður skipt út og í stað þess mun standa einstaklingur með þroskahömlun. Í lögum um þjónustu- og þekkingarmiðstöð fyrir blinda, sjónskerta og daufblinda einstaklinga er talað um daufblinda, en í staðinn verður nú talað um einstaklinga með samþætta sjón- og heyrnarskerðingu.
Þá verður hætt að nota orðið fatlaðir og í staðinn talað um fatlað fólk í ýmsum lögum.
