Pósturinn og Síminn hafa tekið höndum saman þannig að viðskiptavinir Símans geta gengið að búnaði og frelsiskortum vísum hjá Póstinum á landsbyggðinni frá 1. ágúst.
Stöðum þar sem hægt verður að nálgast búnað Símans fjölgar með samstarfinu. Íbúar Eskifjarðar, Hellu, Hvolsvallar, Búðardals og Dalvíkur geta nú einnig nálgast búnað í heimabyggð.
„Við höfum verið að efla pósthúsin sem þjónustumiðstöðvar og nýta net okkar um land allt til að bjóða upp á margvíslega þjónustu viðskiptavinum okkar til hagsbóta. Samstarfið við Símann smellpassar við þessa stefnu okkar,“ er haft eftir Ingimundi Sigurpálssyni, forstjóra Póstsins, í tilkynningu.
Samstarfið við Póstinn felur í sér veigamiklar breytingar á þjónustu Símans á landsbyggðinni. Síminn skipti áður við sautján ólík fyrirtæki á nítján stöðum.