*

miðvikudagur, 11. desember 2019
Innlent 11. nóvember 2019 16:17

Seðlabankastjóri ætli að stjórna launakjörum

Framkvæmdastjóri Eflingar segir ummæli seðlabankastjóra sýna að hann ætli að stjórna launakjörum Íslendinga.

Ritstjórn
Viðar Þorsteinsson er framkvæmdastjóri Eflingar.
Haraldur Jónasson

Viðar Þorsteinsson, framkvæmdastjóri Eflingar, stærsta verkalýðsfélags landsins, gagnrýnir harðlega í færslu á Facebook ummæli Ásgeirs Jónssonar seðlabankastjóra um að laun verkamanna í Þýskalandi ættu að vera viðmið launakjara hér á landi. Ásgeir lét ummælin falla á peningamálafundi Viðskiptaráðs í síðustu viku en í færslu Viðars er vísað í frétt Viðskiptablaðsins um erindi seðlabankastjórans.

Viðar gerir tvær athugasemdir við ummæli Ásgeirs. „Í fyrsta lagi sýnir hann hér, á fundi með vinum sínum í Viðskiptaráði, að hann ætlar sér að stjórna launakjörum Íslendinga. Í hvers umboði? Hver kaus hann til þess? Enginn veit! En ánægja auðstéttarinnar er eflaust mikil,“  skrifar Viðar sem útskýrir ánægju auðstéttarinnar í næstu athugasemd. 

„Í öðru lagi sýnir Ásgeir Jónsson að hugmyndir hans um launakjör almennings eru hörmulegt nýfrjálshyggju-afturhald, upp úr forskrift Þýskalands, sem hefur á síðustu áratugum holað vinnumarkaðinn að innan með árásum á láglaunafólk sbr “Hartz IV” vinnumarkaðsstefnuna. Sú stefna gerði Þýskaland leiðandi í innleiðingu óöryggis á vinnumarkaði og sköpun nýrrar stéttar lausavinnufólks á smánarlaunum (“precariat”), sem aftur hefur haldið launum allra niðri, svo mjög að jafnvel bjúrókratar ESB hafa lýst áhyggjum,“ skrifar Viðar ennfremur sem bætir við í niðurlagi færslunnar: 

„En hvað sem öðru líður er deginum ljósara að íslenska auðstéttin hefur eignast öflugan bandamann í nýjum selabankastjóra.“ 

Nokkur ummæli er við færslu Viðars meðal annars leggur Stefán Ólafsson, prófessor við Háskóla Íslands, orð í belg. „Hárrétt Viðar. Þetta er allt saman langt út fyrir mörkin! Þjóðverjar héldu launum óbreyttum meira og minna í tíu ár þegar hagvöxtur var ágætur - að bandarískri fyrirmynd. Að setja það fram sem fyrirmynd fyrir Ísland er ígildi þess að kasta stríðshanska að launafólki. Leiðinlegt að sjá seðlabankastjóra taka svona afstöðu í þágu atvinnurekenda og fjárfesta. Raunar óþolandi,“ skrifar Stefán Ólafsson.